Me vendosjen e luleve dhe nderimin e viktimave në Urën “Suada dhe Olga”, u shënua 33-vjetori i fillimit të rrethimit të Sarajevës, rrethimi më i gjatë i një kryeqytetit të Bosnjë dhe Hercegovinës në historinë moderne të luftërave.

Kryetari i Sarajevës, Predrag Puhariq, theksoi se me shënimin e Ditës së Rrethimit të Sarajevës, më 5 prill, ruhet kultura e kujtesës. Ai kujtoi se Suada Dilberoviq dhe Olga Suçiq, të cilat u vranë në këtë ditë në vitin 1992 në urën në qendër të Sarajevës, ishin viktimat e para civile të rrethimit gjatë luftës në Bosnjë dhe Hercegovinë në vitet 90.

“Kjo është diçka që kurrë nuk duhet ta harrojmë, dhe këto viktima duhet të mbeten të rëndësishme. E vërteta për atë që ndodhi në Sarajevë dhe Bosnjë dhe Hercegovinë kurrë nuk duhet të harrohet dhe nuk duhet lejuar interpretimi i ndryshëm i saj”, tha Puhariq.

Rrethimi i Sarajevës ishte një nga rrethimet më të gjata në historinë moderne të luftërave dhe më i gjatë i një kryeqyteti. Rrethimi ka zgjatur gjithsej 44 muaj ose 1.425 ditë, nga 5 prilli 1992 deri më 29 shkurt 1996, raporton Anadolu.

Gjatë rrethimit humbën jetën 11.541 qytetarë të Sarajevës, përfshirë 1.601 fëmijë.

Për shkak të terrorizimit të civilëve gjatë rrethimit të Sarajevës në periudhën 1992-1995, ndër të tjerë, organet ndërkombëtare të drejtësisë dënuan me burgim të përjetshëm komandantin ushtarak të Ushtrisë së Republikës Sërpska, Ratko Mlladiq, dhe presidentin e kohës së luftës të Republikës Sërpska, Radovan Karadxhiq./RTK