Kombëtarja e Kosovës do të zhvillojë nesër (e hënë) ndeshjen e dytë në edicionin e ri të Ligës së Kombeve.

‘Dardanët’ do të përballen me Qipron, me synimin për të arritur një fitore pas humbjes prej 3-0 që pësuan në Prishtinë nga Rumania.

Kapiteni i Kosovës, Amir Rrahmani, ishte i pranishëm në konferencën për shtyp së bashku me përzgjedhësin Franco Foda, dhe ka shprehur rëndësinë e kësaj ndeshjeje.

Rrahmani e përshkroi ndeshjen ndaj Qipros si një mundësi të rëndësishme për Kosovën dhe theksoi se vetëm fitorja është e pranueshme.

“Ndeshja e nesërme është shumë e rëndësishme për ecurinë tonë, sepse na jep shans dhe shpresa për kualifikim deri në fund. Çdo ndeshje është e rëndësishme dhe vetëm fitorja na kryen punë,” ka deklaruar shkurtimisht Rrahmani.

Kjo ndeshje do të jetë hera e tretë që Kosova përballet me Qipron në Ligën e Kombeve, pas dy fitoreve të mëparshme kundër këtij kundërshtari./Sinjali/