Është thënë që SC Gjilani po shpërbëhet, por nuk duket se do të ndodh kjo. Sot (e hënë) është mësuar që Florim Zuka pritet që ta drejtojë klubin në të ardhmen

Me kthimin e Zukën besohet që trajner i Gjilanit do të kthehet si trajner edhe Zekirija Ramadanin i cili dha dorëheqje javë më parë.

Madje, sipas raportimeve të Kanal 10, Ramadani tashmë ka ftuar futbollistët në stërvitje dhe ato pritet që të mbahen këtë javë. Po ashtu besohet se futbollistët e Gjilanit nuk do të largohen dhe do të këtë madje edhe përforcime.

Kujtojmë së gjatë kohës sa Gjilani ishte në drejtim të Florim Zukës ishte njëri prej ekipeve më stabile në Superligë, por gjatë verës së kaluar Zuka tha se do të largohet si President i klubit.

Mirëpo, gjatë kësaj kohe askush nuk u paraqit për ta marrë drejtimin e Gjilanit, trajneri dhe futbollistët kanë vazhduar punën dhe gjatë pjesës së parë të kampionatit Gjilani përfundoi në vendin e katër. Është thënë po ashtu që Gjilani do të dalë në shitje dhe çmimi i shitjes së tij ishte 550 mijë euro.

Me këto mjete është synuar që të paguhen borxhet ndaj futbollistëve por duket se gjërat kanë ndryshuar dhe se Gjilani do të jetë përsëri një ekip stabil dhe synimi i tyre është që të luajnë në Europë në sezonin e ri.