Ministri për Çështjet Evropiane i Republikës Çeke, Martin Dvorak, kërkoi që Bashkimi Evropian të angazhohet më intensivisht në procesin e zgjerimit, duke theksuar se anëtarësimi i shteteve të tjera do të forconte sigurinë dhe konkurrueshmërinë e BE-së në një kohë të pasigurisë gjeopolitike.

Deklarata e tij erdhi pas takimit me Komisioneren Evropiane për Zgjerimin, Marta Kos, në Pragë.

Dvorak theksoi se shtetet që janë në procesin e integrimit, përfshirë Ukrainën, Moldavinë, Serbinë dhe Shqipërinë, janë thelbësore për stabilitetin e kontinentit dhe duhet të përfshihen më shumë në debatet politike të BE-së.

Kos, nga ana e saj, paralajmëroi se procesi i zgjerimit është përballur me sfida të mëdha, duke përmendur “forcat përçarëse” që po kërcënojnë unitetin e BE-së.

Ajo theksoi se ky është momenti që BE-ja duhet të mbetet e bashkuar dhe të mbështesë integrimin e shteteve të tjera.

Në kuadër të këtij takimi, Dvorak përfundoi duke thënë se zgjerimi mund të ketë një ndikim të madh në të ardhmen e Evropës dhe duhet të mbetet një prioritet i lartë për Bashkimin Evropian./Sinjali/