Prishtina ishte nikoqir i Llapit në kryeqytet në ndeshjen e parë gjysmëfinale të Kupës së Kosovës.

Ndeshja e zhvilluar në “Fadil Vokrri” i takoi Llapit me rezultat 2:3, shkruan FrontOnline.

Pas ndeshjes, trajneri i Prishtinës, Zekirija Ramadani është justifikuar për humbjen duke thënë se skuadra e tij kishte mungesa.

“Llapi nuk ndryshoi, por ndryshuam ne. Ne kishim shumë mungesa. E dhamë maksimumin në Suharekë. Një humbje e dhimbshme, por e dinimin se do të jetë vështirë t’i mbajmë dy fronte”, ka thënë Ramadani në “ArtSport”.

“Kemi edhe 90 minuta, ende s’jemi eliminuar nga Kupa. Duhet të harrojmë këtë humbje. Duhet ta menaxhojmë mirë gjendjen e futbollistëve. Duhet t’ia lëmë kohës të shohim nëse jemi në luftë për dy tituj. Po të kishim disa lojtarë, do të ishim ndryshe sot”, tregoi ai.

Ndërkaq, trajneri i Llapit, Tahir Batatina u shpreh i lumtur me fitoren e sotme.

“Realizuam gol në momentet më të mira. Mendoj se ishte goli i qetësisë. Ishim të vëmendshëm dhe të kujdesshëm. Sot pranuam dy gola të lehtë dhe duhet të jemi të kujdesshëm lojën e radhës. E kemi freskinë e duhur në skuadër dhe e kemi bërë maksimumin”, ka deklaruar Batatina në “ArtSport”.

“Mund të them se Prishtina ka pasur mundësi në fund ta barazonte. Gjithmonë skuadra si Prishtina mund të shënojnë në detaje të vogla. E arritëm objektivin por duhet të jemi të vëmendshëm”, shtoi trajneri llapjan./FrontOnline/