Kryetari i Prishtinës, Përparim Rama, ka kritikuar Qeverinë për pengesat që, sipas tij, po krijohen në projektet kryesore të kryeqytetit, duke përfshirë edhe ndërtimin/zhvillimin e projektit të “Fshatit Olimpik”.

Në “Debat Plus”, Rama theksoi se kryeqyteti nuk varet nga fondet e Qeverisë për zhvillimin e “Fshatit Olimpik”, por kërkoi që ekzekutivi të mos i bllokojë.

Rama e ka ritheksuar se nëse Qeveria nuk mund të ndihmojë, atëherë të paktën të mos pengojë.

“Ne kemi organizuar konferencën e parë të investitorëve ku i kemi prezantuar projektet kyçe për kryeqytet. Kemi organizuar konferencën e dytë, prej investitorëve që kanë thënë ‘po ne ua bëjmë unazën, edhe ‘Fshatin Olimpik’ dhe shumë projekte tjera që i vyejnë kryeqytetit’. Në këmbim të investimeve ku ata i ndërtojnë hotelet, zonat administrative, zonat komerciale. D.m.th. ne nuk varemi prej Qeverisë, krejt çka kërkoj prej Qeverisë është mos të na bllokojë. Mos na bllokoni, na lëreni të punojmë. Nëse s’po na ndihmon mos na blloko. Mos jeni bllokues dhe krejt i bëjmë pas një cent të taksapaguesve”, ka thënë Rama.