Kryeministri i Shqipërisë Edi Rama njoftoi se qeveria e tij po mendon ta ndalojë përdorimin e TikTokut dhe Snapchatit në vend.
Ai i bëri këto deklarata ndërsa fliste për vrasjen makabre të një 14-vjeçari nga një adoleshent tjetër në Tiranë.
“Prej tre ditësh, i madh e i vogël është tronditur nga vrasja makabre e një nxënësi 14-vjeçar me thikë nga një adoleshent tjetër. E gjithë dinamika e tragjedisë nxjerr në pah kërcënimin permanent me të cilin jetojnë të gjitha familjet që rrisin fëmijë në botën e sotme ku rrjetet sociale dhe posaçërisht TikTok-u apo Snapchat-i, thithin përditë në labirintet e tyre fëmijët qysh në moshë të vogla. Autoriteti i prindërve dhe mësuesve si dhe të gjitha përpjekjet tona në familje dhe shkollë për edukimin e fëmijëve sfidohen orë e çast nga bota paralele e këtyre rrjeteve ku nuk ka asnjë filtër, asnjë mbrojtje, asnjë stimul pozitiv në mbështetje të këtyre përpjekjeve dhe ku jo vetëm edukimi, por deri edhe shëndeti mendor i më të vegjëlve dhe adoleshentëve vihen seriozisht në pikëpyetje. Këto janë të vërteta të thjeshte me të cilat nuk është e vështirë të gjithë të biem dakord si prindër apo si qytetarë dëshmitarë të shoqërisë, të kohës, të botës së sotme ku garantimi i sigurisë së fëmijëve është përparësi e përparësive tonë. Por, nuk janë po kaq të thjeshta përgjigjet e duhura në këto kushte, ku shumë shtete po mundohen të vendosin filtra mbrojtës, por ende pa asnjë rezultat domethënës”, tha Rama.
“Jemi angazhuar prej kohësh në hulumtimin e kësaj problematike, duke parë vendet e tjera. Vende si Australia po tentojnë ndalimin e aksesit në rrjetet sociale të fëmijëve deri në 16 vjeç, Franca po vendos kusht aprovimin e prindërve për hapjen e llogarive… Përtej debateve, problem mbetet mungesa e një sistemi të zbatimit të tyre. Tani, dilemma jonë si qeveri është nëse duhet të provojmë edhe ne të ecim në drejtim të vendosjes së filtrave, ku në fakt nga eksperiencat e të tjerëva mësojme se efektiviteti i tyre është shumë i ulët, apo të ndërmarrim një masë drastike për mbylljen e plotë të TikTok-ut dhe Snapchat-it. Këtë do ta shtrojmë për diskutim për të marrë një vendim për këtë problem kompleks”, shtoi ai.
