Në një takim me të rinjtë e Durrësit, një ditë para nisjes zyrtare të fushatës për zgjedhjet e 11 majit, Kryeministri Edi Rama u ndal te mesazhet kyçe të Partisë Socialiste për këtë garë elektorale, duke vënë theksin te integrimi në Bashkimin Europian dhe fuqizimi i votës së të rinjve.
“Nëse mbyllim këtë kapitull të historisë, mbyllim njëkohësisht edhe plagët e vjetra. Nuk do të ndjehemi më të përbuzur e të shtypur, as nga të huajt, as nga vetvetja”,– deklaroi Rama.
Takimi nisi me fjalën hyrëse të drejtueses politike të qarkut, Emiriana Sako, e cila prezantoi edhe kandidatët e zonës. Më pas, Rama iu drejtua të rinjve si “pjesa më vitale e shoqërisë”, duke i ftuar ata të marrin pjesë aktive në zgjedhje.
“Zgjedhjet e 11 majit nuk janë si të tjerat. Këtë herë vendoset konkretisht për të ardhmen tuaj. Është koha për të kurorëzuar ëndrrën që shqiptarët e kanë pasur prej vitit 1991: ‘Ta bëjmë Shqipërinë si Europa” – tha Rama.
Ai theksoi se përfitimet nga anëtarësimi në BE nuk janë thjesht politike, por prekëse në jetën e përditshme.
“Sot ne mund të shkojmë kudo në Europë, por nuk mund të qëndrojmë. Kërkojmë azil sepse nuk jemi të integruar. Nëse jemi në BE, nuk shkojmë më si azilantë, por si qytetarë europianë me të gjitha të drejtat,” – shtoi ai.
Rama vlerësoi arritjet në reformën në drejtësi, duke e cilësuar si një prej transformimeve më të rëndësishme që i paraprin anëtarësimit në BE.
“Për herë të parë në histori, drejtësia nuk pyet se kush është në pushtet. Po shihni ministra, deputetë, zyrtarë që hetohen e ndëshkohen. Kjo nuk ndodhte kurrë më parë. Jemi kryelartë që drejtësia po bën punën e saj,” – u shpreh ai.
Duke iu përgjigjur edhe kritikëve politikë, Rama ironizoi deklaratat e kreut të opozitës Lulzim Basha.
“Po Lulin e keni dëgjuar? ‘Ku i ke shokët Ramë?’ thotë ai. Vetëm tek pull si shofer policie. Sa qesharakë që janë!”, tha Rama.
Kryeministri përmbylli fjalën me një apel të drejtpërdrejtë për mobilizim maksimal në Durrës.
“Ne duhet të dalim në 11 Maj me mbi 900 mijë vota. Këtu në Durrës jemi shumë afër mandatit të 9. Kemi përvojën, kemi besimin. Le ta bëjmë!”
Rama përmendi gjithashtu edhe rolin e diasporës, duke përmendur potencialin e 1 milion votave që mund të sjellin shqiptarët jashtë vendit, nëse realizohet pjesëmarrja e tyre në zgjedhje./Express/
