Kryeministri Edi Rama mori pjesë sot në takimin e nivelit të lartë “Shqipëria 2030 në BE – Rruga e reformave”, ku theksoi se integrimi i Shqipërisë në Bashkimin Europian është një domosdoshmëri historike.

Gjatë fjalës së tij, Rama theksoi që Shqipëria duhet të përfitojë nga mundësia aktuale për të mbyllur negociatat deri në vitin 2027.

“Për ne shqiptarët, anëtarësia në BE do të thotë liri nga hija e historisë sonë dhe siguri që liria jonë individuale dhe barazia para ligjit nuk do të varen nga kush qeveris në Tiranë”, tha ai. Rama nënvizoi se reformat antikorrupsion dhe përmirësimi i qeverisjes janë prioritet kyç në këtë proces.

Kryeministri u shpreh se Shqipëria nuk duhet ta humbasë këtë mundësi historike: “Dera që është hapur duhet shfrytëzuar sa pa u mbyllur. Ne e dimë shumë mirë që BE nuk është një park ku shkohet për qejf, por familja e vetme ku mund të kemi një të ardhme të sigurt.”

Zëvendëssekretari i Përgjithshëm i Këshillit të Europës, Bjorn Berge, vlerësoi progresin e Shqipërisë dhe u shpreh optimist për anëtarësinë në BE deri në vitin 2030.

“Ne e dimë që kjo e ardhme ndodhi falë punës së madhe dhe guximshme që keni bërë ju. Shqipëria ka shënuar progres në drejtësi, antikorrupsion dhe qeverisje të mirë,” deklaroi ai.

Sipas Berge, reformat në drejtësi dhe puna e institucioneve të specializuara, si SPAK, janë tregues të angazhimit të Shqipërisë. Megjithatë, ai theksoi se vendi ende përballlet me sfida, si procedurat e gjata gjyqësore dhe mungesa e një strukture për rikuperimin e aseteve të krimit.

“Sistemi gjyqësor vijon të ketë sfida strukturore. Procedurat gjyqësore mbeten të gjata dhe ende nuk është ngritur një zyrë e posaçme për konfiskimin e pasurive të paligjshme,” tha Berge.

Ai gjithashtu vuri në dukje sfidat e organizatave të shoqërisë civile dhe theksoi se polarizimi politik përfaqëson një pengesë për konsensusin kombëtar.

“Demokracia nuk është destinacion, por një proces që kërkon përkushtim të vazhdueshëm,” theksoi ai.