Kryeministri Edi Rama ka shprehur mirënjohjen për Presidentin e Komitetit Ekonomik dhe Social Europian, Oliver Röpke, gjatë një takimi të mbajtur këtë të premte, duke e cilësuar si një nga miqtë më të veçantë të Shqipërisë në rrugën drejt integrimit europian.

Duke falënderuar Röpke për mbështetjen e dhënë ndër vite, Rama nuk i kurseu batutat: “Nuk e di cila do të jetë puna juaj e ardhshme, por të jeni të sigurt se Shqipëria do t’ju japë një punë, nëse Brukseli do të hakmerret e t’ju lërë pas dore. Mund t’ju ofroj një punë, përveç postit tim.”

Rama shtoi se Röpke “ka qenë një sindikalist i vërtetë që ka thyer tavanet e xhamit për Shqipërinë” dhe theksoi se puna e tij do të mbetet një themel i rëndësishëm për të ardhmen.

Në fjalën e tij, kryeministri vuri në dukje rëndësinë e pranisë së Bashkimit Europian për Shqipërinë, duke e krahasuar me vendet që kanë pësuar ndërhyrje të dështuara si Afganistani apo Iraku: “Pa BE, bazuar në historinë tonë, nuk do të ishim këtu ku jemi sot.”