Kryeshefi i Ndërmarrjes Publike ujësjellësi “Prishtina” Ilir Abdullahu vetëm gjatë vitit që lamë pas në kundërshtim me ligjin ka punësuar në ndërmarrjen që ai menaxhon një numër të konsiderueshëm të punëtoreve, e të cilët nuk i kanë plotësuar kriteret e parapara me konkursin.

Në një raport konfidencial të përpiluar nga zyra e Auditorit të Brendshëm (ZAB) e të cilin e ka siguruar “Front Online” thuhet se ZAB-ja gjatë punës audituese ka analizuar kushtet e veçanta (obligative) të kërkuara në konkurse për kandidatet me të suksesshme.

“Nga analizat e bëra konsiderojmë se në rastet e identifikuara kandidatet e suksesshëm nuk i kanë plotësuar të gjitha kriteret e kërkuara” thuhet në raportin e siguruar nga Front Online.

Aty më tutje thuhet se të pozita e punës për punësimin e 3 arkëtareve është konstatuar se diploma e shkollës së mesme e njërit prej tre kandidateve (emër i njohur për redaksinë) nuk e ka diplomën adekuate të shkollës sipas konkursit të kërkuar.

Sipas konkursit është kërkuar që për këtë pozitë punë gjimnazi drejtimi ekonomik, juridik, apo edhe gjimnazi i përgjithshëm, e deri sa kandidatja e përzgjedhur sipas raportit konfidencial të Zyrës së Auditorit të Brendshëm ka ofruar diplomën e shkollës së mesme, drejtimi teknik.

Front Online i ka dërguar pyetje krye shefit dhe zëdhënëses së kësaj kompanie publike, por nga ata nuk ka marrë përgjigje.

Po ashtu “Front Online” gjatë ditëve në vijim do të publikoj dokumente rreth shkeljeve të shumta ligjore që kanë ndodhur në Ndërmarrjen Publike e cila drejtohet nga Ilir Abdullahu

Po ashtu, ditë më parë “Front Online”  ka raportuar se Kryeshefi i Ndërmarrjes Publike Qendrore, Ujësjellësi “Prishtina”, Ilir Abdullahu vetëm gjatë vitit që lamë pas ka punësuar hiç më pakë se 39 persona, të cilëve ai iu ka krijuar pozita të punës jashtë planit.

Në raportin e auditorit të brendshëm të cilin e ka siguruar “Front Online” thuhet se numri i të punësuarave në krahasim me numrin e parashikuar në planin e biznesit për vitin 2018 ka një rritje të theksuar për 39 të punësuar në krahasim me numrin e parashikuar në planin e biznesit për vitin 2018, ndërsa në krahasim me numrin e numrin e të punësuarave  për vitin 2017 është rritur për 49 të punësuar.

“Ka krijim të vendeve të punës pa qene në rregulloren e brendshme, por edhe pozitat që nuk janë në rregulloret e brendshme ekzistojnë kërkesat/ arsyeshmeria e njësive përkatëse dhe gjithashtu aprovimi i Kryeshefit Ekzekutiv për pozita të tilla” thuhet në raportin e auditorit të brendshme të cilin e ka siguruar “Front Online”.

Po ashtu, para pakë ditësh Front Online ka raportuar se një konzorcium i kompanive nga Beogradi ka fituar së fundi tender në njërën nga kompanitë më të madhe publike të Kosovës.

Portali “Front Online” ka siguruar dokumente ku konzorciumi i kompanive “Vlera SHPK dhe EKO DEZ DOO Beograd” kanë fituar kontratë në vlerë prej rreth 10 mijë euro nga Kompania Regjionale e Ujësjellësit “Prishtina”.

Ky konzorcium i kompanive ka fituar kontratën për dezinfektimin, dezinsektim dhe deratizimin e objekteve të KRU “Prishtina”.

Në garën për ta fituar këtë tender nga “Ujësjellësi” kishin qenë tri kompani, ku një kompani tjetër vendore kishte konkurruar me çmim prej 11.328 euro, ndërsa oferta më e shtrenjtë nga kompania vendore ka qenë 19.635 euro.

Zëdhënësja e Ujësjellësit Rajonal “Prishtina”, Arjeta Mjeku, i ka deklaruar portalit “Front Online” se kontrata me konzorciumin nga Beogradi ka filluar të implementohet  menjëherë pas nënshkrimit të saj.

“Me kontratë është shpërblyer Operatori Ekonomik VLERA SH.P.K me seli ne Shtime”, ka thënë Mjeku, duke pranuar se EkoDez nga Beogradi ka qenë njëri nga anëtarët e grupit të operatorëve.

“KRU Prishtina sh.a, ka nënshkruar kontratë me OE Vlera SHP”, ka potencuar ajo.

Përndryshe, Qeveria e Kosovës nën udhëheqjen e kryeministrit Ramush Haradinaj në nëntor të vitit të kaluar ka marrë vendim që t’i vendos taksë 100 për qind mallrave nga Serbia. Madje taksës prej asaj kohe i nënshtrohen edhe markat e huaja që prodhohen në Serbi.

Zyrtarët qeveritarë disa herë kanë përsëritur se duhet favorizuar vetëm kompanitë vendore në tenderët publik, përderisa në Kosovë operojnë disa kompani vendore që janë të specializuara për dezinfektim, dezinsektim dhe deratizim.

Megjithatë, zëdhënësja Mjeku arsyetohet se Ligji i Prokurimit Publik nuk ia ndalon shpërblimin e kontratave tek operatorët ekonomik vendor edhe nëse ata kanë anëtar në grup, të cilët nuk janë vendor./ Front Online /