Pse VV-ja po e kundërshton tërheqjen e kursimeve pensionale? Edhe drejtori i Trustit i kishte tërhequr 10%

Në seancën e së enjtes (pasnesër) të Kuvendit të Kosovës para deputetëve do të jetë Projektligji për tërheqjen e një pjese të kursimeve pensionale si iniciativë për zbutjen e efekteve të larta negative të inflacionit në vend.

Por, deputetët e Lëvizjes “Vetëvendosje”, të cilët janë shumicë në Kuvend, po e kundërshtojnë një iniciativë të tillë, ndonëse shkalla e inflacionit muajin e kaluar në Kosovë ka arritur 12.1%, përderisa artikujt elementarë janë shtrenjtuar mbi 30%.

“Vetëvendosje” as në vitin 2020 nuk e kishte përkrahur tërheqjen e 10% të Trustit, iniciativë kjo e ish-Qeverisë “Hoti”, ndonëse shumë deputetë të saj kanë deklaruar se i kanë tërhequr mjetet e Trustit.

Me qëndrimin për mos tërheqjen e mjeteve të Trustit nuk është bindur as drejtori i Trustit, Adrian Zalli, i cili është ekspert i njohur i fushës së investimeve në tregjet globale, i cili në formularin e deklarimit të pasurisë në Agjencinë Kundër Korrupsionit për vitin 2022 ka deklaruar se i ka tërhequr 16579 euro në emër të 10% të kursimeve pensionale në Trust, raporton Front Online.

Përdallim nga deputetët e VV-së, opozita në Kuvend është që qytetarëve të Kosovës edhe këtë herë t’i lejohet tërheqja e një përqindje të caktuar të kursimeve pensionale, pasi që, sipas tyre, ka rritje astronomike të çmimeve, përderisa pagat dhe pensionet kanë mbetur të njëjta që nga viti 2014. /Front Online/

Menaxho shpenzimet dhe fito zbritje me aplikacionin e Petrol Company

Sponsoruar