Në mbledhjen e sotme të qeverisë së Kosovës me ndryshim-plotësimet e një udhëzimi administrative, që lidhet me pronat e Radoiçiqit.
Pronat e sekuestruara të kryekriminelit serb, do t’i jepen në shfrytëzim Ministrisë së Brendshme të Kosovës (MPB), përkatësisht Policisë së Kosovës.
Radoiçiqin, Kosova e kërkon si përgjegjës për organizimin e sulmit terrorist në Banjskë në shtator të vitit të kaluar.
Në këtë sulm mbeti i vrarë rreshteri policor, Afrim Bunjaku ndërsa në përleshjet e armatosura që pasuan, u vranë edhe tre sulmues serb.
Radoiçiq është ende i lirë në Serbi teksa nga Prokuroria Speciale në Kosovë pas 10 muajsh nga ky sulm ende nuk është ngritur aktakuzë për të dhe grupin e tij.
Gjatë një aksioni në prill, Agjencia për Administrimin e Pasurive të Sekuestruara ose të Konfiskuara e Kosovës sekuestroi dy prona të paluajtshme në Mitrovicën e Veriut, një restorant dhe një banesë, si dhe një vilë në komunën e Zubin Potokut – që të gjitha në pronësi të Radoiçiqit.
Ministrja e Drejtësisë e Kosovës, Albulena Haxhiu, në mbledhjen e qeverisë tha se këto prona, aktualisht, janë nën menaxhim të ministrisë që udhëheq ajo, përkatësisht Agjencisë për Administrimin e Pasurive të Sekuestruara ose të Konfiskuara të Kosovës.
Haxhiu tha se ndryshimet në udhëzimin administrativ janë të rëndësishme, sepse i eliminojnë procedurat e tejzgjatura për dhënien me qira të pasurive të sekuestruara dhe të konfiskuara, kur ato i kërkon një institucion publik ose organ shtetëror.
