Mbrëmjen e së martës si pasojë e disa të shtënave me armë në një lokal në Prishtinë, dy persona mbetën të plagosur por plagëve s’arriti t’iu mbijetojë 62 vjeçari Naser Gashi. I dyshuari për këtë rat, Alban Gashi, ende nuk është arrestuar, ndërsa nga Prokuroria kanë thënë se nuk janë bërë të ditura motivet.

Të martën rreth orës 22:25, sipas Policisë dy persona të armatosur dhe të maskuar kanë shtënë më armë zjarri në drejtim të dy viktimave. Miftar Miftari ende ndodhet në QKUK, ndërsa tjetri, Naser Gashi, ndërroi jetë po atë natë.

Lidhur me këtë rast, i dyshuar është Alban Gashi, i cili akoma nuk është arrestuar.

Zëdhënësja e Prokurorisë Themelore në Prishtinë, Kaltrina Shala, ka thënë për Express se deri tani nuk ka asnjë të arrestuar por ka shtuar se ka përpjekje që të zbardhet rasti.

“Ju njoftojmë, se deri më tani nuk ka të arrestuar, mirëpo Njësitet e Policisë nën udhëheqjen e Prokurorisë Themelore në Prishtinë po bëjnë përpjekjet maksimale për zbardhjen e rastit në fjalë”, deklaroi ai.

Shala tha se “deri më tani, nuk janë bërë të ditura motivet e kësaj vrasje dhe hetimet janë në vazhdim”

Rreth këtij rasti, për Express, shkurtimisht është deklaruar koloneli në pension i FSK-së, Afrim Veseli, me të cilin ky i fundit ka pasur edhe lidhje familjare.

Veseli në deklarimin e tij ka thënë se rasti ka ndodhur aksidentalisht.

Ai ka thënë se viktima s’ka pasur ‘‘kurrfarë lidhje’’ me rastin.

‘‘Aksidentalisht ka ndodh. Hiç kurrfarë lidhje s’ka’’, ka thënë ai.

Sipas Sinjalit, i dyshuari Alban Gashi dhe Miftar Miftari kanë pasur disa probleme mes vete në Spanjë dhe vetëm para pak ditësh kanë ardhur në Kosovë.

Kjo është vrasja e tretë që ndodhi brenda tri ditësh në Kosovë, pasi të dielën dhe të hënën Vushtrria u godit nga dy vrasje.