Prodhuesit gjermanë të makinave paralajmëruan të enjten për pasoja të rënda si rezultat i tarifave të importit të SHBA-së për automjetet e prodhimit të huaj të shpallur nga presidenti Donald Trump.

Tarifat zbatohen për të gjitha makinat që nuk janë prodhuar në SHBA, që do të thotë se edhe prodhuesit amerikanë me modele të prodhuara jashtë shtetit do të dëmtohen sipas skemës.

Trump kishte thënë se një tarifë prej 25% do të hynte në fuqi më 2 prill.

Dhe Shoqata Gjermane e Industrisë së Automjeteve (VDA) tha se tarifat do të ishin një barrë e konsiderueshme si për kompanitë ashtu edhe për zinxhirët globalë të furnizimit, shkruajnë mediat e huaja.

Presidentja e VDA-së Hildegard Müller tha se ato do të kishin pasoja negative për konsumatorët, përfshirë Amerikën e Veriut.

“Pasojat do të godasin rritjen dhe prosperitetin në të gjitha anët”, ka thënë Müller.

Ajo bëri thirrje për negociata të menjëhershme midis Shteteve të Bashkuara dhe Bashkimit Evropian për një marrëveshje dypalëshe, e cila mund të përfshijë edhe fusha të tjera.

Sipas VDA, 86% e ndërmarrjeve të vogla dhe të mesme në sektorin e automobilave në Gjermani presin që tarifat t’i prekin ato.

Tarifat ka të ngjarë të godasin rëndë industrinë vendase të makinave, pasi SHBA është tregu më i rëndësishëm i shitjeve për prodhuesit gjermanë, sipas shifrave të fundit zyrtare.

Rreth 13.1% e eksporteve gjermane të makinave përfundon atje, e ndjekur nga Mbretëria e Bashkuar dhe Franca. /Telegrafi/