Tash e disa muaj, shumë qytetarë të Kosovës kanë mbetur në pritje për t’u pajisur me letërnjoftim.

Mungesa e këtij dokumenti identifikimi po bënë që qytetarët të presin 3 deri në 6 muaj.

Por këtij problemi shpejt pritet që t’i vije fundi.

Nga Ministria e Punëve të Brendshme (MPB) thonë se janë duke u angazhuar që në pjesën e dytë të dhjetorit të nisë pajisja me letërnjoftim.

“Angazhimi ynë është që kthimi në normalitet të ndodh kah mesi i dhjetorit të këtij viti”,  thuhet në përgjigjen e MPB-së për FrontOnline.

Nga kjo ministri kanë treguar edhe faktorët që kanë ndikuar në mungesën e materialit për prodhimin e letërnjoftimeve.

Ata thonë se shkak kryesorë ka qenë pandemia Covid-19.

“Duke pas parasysh se pandemia COVID-19 ka shkaktuar vështirësi në tregun botëror, ashtu ka ndikuar edhe tek ne përkatësisht në furnizimin me material për dokumente”, bëjnë të ditur për Front Online nga MPB-ja.

Përkundër problemeve me material, MPB-ja është duke i pajisur qytetarët me letërnjoftim, por me një numër më të vogël.

“Edhe për kundër kësaj çështje, pajisja e qytetareve me letërnjoftime është duke vazhduar, por me një numër të konsideruar”, thuhet tutje në përgjigjen e tyre për Front Online.

Kohë më parë, Ministria e Punëve të Brendshme e Kosovës ka njoftuar se ua ka mundësuar qytetarëve që pavarësisht skadimit të afatit për këtë dokument, mund ta përdorin atë deri në 6 muaj pas skadimit./FrontOnline