Në një atmosferë festive dhe me pjesëmarrje të gjerë të nxënësve dhe mësimdhënësve, sot në kryeqytet ka nisur Liga e Shkollave, një projekt i përbashkët i Komunës së Prishtinës dhe Federatës së Futbollit të Kosovës (FFK), i cili po implementohet nga organizata “Prishtina Tournament”.
Ky projekt përfshin gjithsej 57 shkolla të Komunës së Prishtinës – 44 shkolla fillore të ulëta dhe 13 shkolla të mesme – duke e shndërruar këtë ligë në një ndër iniciativat më të mëdha sportive për të rinjtë në kryeqytet.
Por Liga e Shkollave është më shumë se një garë sportive. Ajo synon të promovojë vlerat edukative të futbollit si bashkëpunimi, respekti, disiplina dhe gara e ndershme, duke u shndërruar në një platformë ku futbolli shërben si mjet për edukim dhe afrimitet ndërmjet brezave të rinj.
Ndeshja hapëse u zhvillua ndërmjet SHFMU “Dardania” dhe SHFMU “Faik Konica”, duke shënuar fillimin simbolik të një gare që do të sjellë përballje të shumta ndërmjet shkollave gjatë javëve në vijim.
Në ceremoninë e hapjes morën pjesë edhe kryetari i Komunës së Prishtinës, Përparim Rama, dhe presidenti i FFK-së, Agim Ademi, të cilët përshëndetën të pranishmit dhe theksuan rëndësinë që projekte të tilla kanë për zhvillimin e sportit dhe edukimin qytetar të gjeneratave të reja.
“Ky projekt nuk është vetëm një garë. Është një mundësi për të zbuluar talente të reja, për të ndërtuar miqësi ndërmjet nxënësve dhe për të forcuar lidhjen mes shkollës dhe sportit si komponentë kyçe në zhvillimin e një shoqërie të shëndetshme,” u tha ndër të tjera në fjalën hyrëse.
Liga e Shkollave pritet të sjellë emocione, gola dhe më shumë se kaq — një shembull të mirë se si sporti, kur bashkohet me vizionin arsimor dhe qytetar, bëhet mjet ndryshimi dhe bashkimi për një të ardhme më të mirë.
