Presidentja e Kosovës, Vjosa Osmani është kthyer ta komentojë incidentin e ndodhur muajin e kaluar në ndeshjen Spanjë – Kosovë.

Televizioni shtetëror spanjoll ia vendosi Kosovës emrin me shkronja të vogla në tabelën e rezultatit, shkruan FrontOnline.

Një gjë e tillë shkaktoi bujë të madhe në mediat ndërkombëtare.

Këtë incident, Osmani e ka komentuar tani për mediumin spanjoll, “El Pais”.

Ajo thotë se “asnjë qytetar i Kosovës” nuk është ndjerë mirë për këtë veprim të spanjollëve.

“Asnjë qytetar i Kosovës nuk është ndier mirë për atë incident sepse ne besojmë që sporti duhet t’i bashkojë njerëzit dhe jo e kundërta, nuk duhet të ketë politikë në sport”, deklaroi Osmani.

“Ishte mjaft për keqardhje, shpresoj që kjo episodë të mbetet prapa nesh dhe të kemi mundësi më të mira për të bashkëpunuar në të ardhmen e afërt, duke konsideruar se Kosovën çfarë është dhe do të mbetet gjithmonë: Republika e Kosovës si një shtet sovran dhe i pavarëur është këtu për të qëndruar”, shtoi ajo.

Ndryshe, ky incident kishte ndodhur në ndeshjen Spanjë – Kosovë, e vlefshme për eliminatoret e Kupës së Botës “Katar 2022”./FrontOnline/