Armenia dhe Azerbajxhani vazhduan të akuzojnë njëri-tjetrin për shkeljen e një armëpushimi humanitar të rënë dakord tre ditë më parë për t’i dhënë fund luftimeve në Nagorni-Karabaku dhe grupet ndërkombëtare po paralajmërojnë një krizë humanitare në rajon.

Një kameraman i reuters dëshmoi bombardimet e qytetit Martuni në Nagorni-Karabaku, një enklavë malore e njohur ndërkombëtarisht si pjesë e Azerbajxhanit, e cila, megjithatë, drejtohet dhe banohet nga armenët.

Shkelja e armëpushimit të bërë përmes Rusisë, me synimin për të lejuar palët në konflikt të shkëmbejnë të burgosurit dhe trupat e të vdekurve, zvogëlon mundësitë për paqe pas shpërthimit të konflikteve vdekjeprurëse më 27 shtator.

Ndërkohë, numri i të vdekurve vazhdon të rritet. Zyrtarët etnikë armenë në Nagorni-Karabaku thanë se 542 ushtarë ishin vrarë, 17 më shumë se e hëna. Azerbajxhani ka njoftuar se 42 civilë azerbajxhanas janë vrarë dhe 206 janë plagosur që nga 27 shtatori.

Luftimet kanë qenë më të ashprat që nga lufta 1991-1994 në Nagorni-Karabaku, e cila la të vdekur rreth 30 mijë njerëz. Jashtë vendit, konflikti po monitorohet nga afër sepse është afër tubacioneve të gazit dhe naftës të Azerbajxhanit për në Evropë dhe ekziston rreziku që të përfshihen si Rusia, ashtu edhe Turqia.

Rusia ka një pakt mbrojtje me Armeninë, ndërsa Turqia është aleate e Azerbajxhanit. Turqia nuk është e përfshirë në ndërmjetësimin, i cili drejtohej nga Franca, Rusia dhe Shtetet e Bashkuara. Ankara ka thënë se mbështet sulmin e Azerbajxhanit për të “rimarrë territoret e saj të okupuara”.