Rreth pesë miliardë euro janë vlerësuar dëmet nga lufta e fundit në Kosovë, të cilat janë shkaktuar nga shteti serb. Këtë statistikë e ka dhënë javën e kaluar, Agjencia e Statistikave të Kosovës (ASK).
Ky vlerësim është bërë paralelisht me regjistrimin e numrit të banorëve në vend, i cili kishte ndodhur në prill të këtij viti.
Megjithatë, rrugë e vështirë e pret Kosovës që të kompensohet me pesë miliardë euro nga Serbia, për shkaktimin e dëmeve të luftës në Kosovë.
Sipas njohësve të drejtësisë, Kosovës i duhet një angazhim i fuqishëm për ta arritur këtë gjë.
Ata thonë se mënyra e vetme që të kompensohet kjo shumë është përmes marrëveshjes politike mes dy vendeve, pasi që dërgimi i këtij rasti në Gjykatën Ndërkombëtare të Drejtësisë (GJND) nuk mund të ndodhë, për shkak se Kosova nuk është pjesë anëtare e OKB-së.
Avokati Qerkini: Për zgjidhjen e dëmeve të luftës, duhet angazhim i vërtetë nga Serbia dhe Kosova
Avokati Artan Qerkini ka deklaruar për “Front Online” se për zgjidhjen e çështjes së dëmeve të luftës, është e nevojshme që të dyja palët, Kosova dhe Serbia, të tregojnë interes të vërtetë për bashkëpunim.
Ai theksoi se Kosova mund të ketë interes për një bashkëpunim në konstatimin dhe vlerësimin e dëmeve të luftës, ndërsa nga Serbia nuk duket të ketë tregues për një angazhim të tillë.
“Nevojitët interesimi i dy palëve. Nga Kosova mund të ketë interes për bashkëpunim në konstatimin dhe vlerësimin e dëmeve të luftës, por siç shihet nga Serbia nuk ka tregues të një bashkëpunimi në mënyrë që kjo çështje të zgjidhet me marrëveshje”, shprehet Qerkini për FrontOnline.
Sipas Qerkinit, në mungesë të një marrëveshjeje direkte ndërmjet dy shteteve, ekzistojnë mekanizma të tjerë për konstatimin dhe riparimin e dëmeve.
Ai theksoi se Kosova nuk mund të drejtohet në Gjykatën Ndërkombëtare të Drejtësisë për shkak të mungesës së statusit të anëtarësisë në OKB.
“Në mungesë të një marrëveshje ekzistojnë mekanizma dytësorë konstatimin dhe riparimin e dëmeve të luftës kjo çështje do të duhej të përfundonte në Gjykatës Ndërkombëtare të Drejtësisë sepse është çështje në mes të dy shteteve por për fat të keq duke qenë që Kosova nuk është ende anëtare e OKB, kjo nuk ka mundësi që në mënyrë të pavarur sa i përket kësaj çështje t’i drejtohet Gjykatës”, deklaroi Qerkini.
Arbër Jashari: Kompensimi i dëmeve të luftës nga Serbia mund të arrihet vetëm përmes forcës ndërkombëtare
Avokati kosovar, Arbër Jashari, për “Front Online” është shprehur se për realizimin e kompensimit të dëmeve të luftës nga Serbia, ekzistojnë vetëm dy mundësi të realizueshme.
Jashari ka sqaruar se e para është përmes një marrëveshjeje politike ndërmjet Kosovës dhe Serbisë, megjithatë, ai e ka vlerësuar këtë mundësi si të papërfillshme dhe të vështirë për t’u realizuar në të ardhmen.
“Ka vetëm dy rrugë për realizimin e kompensimit të dëmeve të luftës nga ana e Serbisë. E para, përmes ndonjë marrëveshje politike, në mes dy shteteve, atij të Kosovës dhe atij të Serbisë, gjë që është shumë pak e besueshme që mund të ndodhë ndonjëherë, dhe e dyta, përmes detyrimit me forcë të shtetit serb që t’i kompensojë këto dëme”, ka thënë Jashari.
Në vazhdim, ai ka shtuar se Kosova dhe institucionet e saj aktuale nuk kanë fuqinë e nevojshme për të detyruar Serbinë që të paguajë për dëmet e luftës.
“Kosova dhe institucionet e saj, nuk kanë fuqi ta detyrojnë Serbinë, që ta bëjë një gjë të tillë. Ndoshta mënyra e vetme, për të arritur diçka në këtë drejtim, është detyrimi i Serbisë, përmes mekanizmave ndërkombëtare të drejtësisë, ose duke e kushtëzuar me mjete politike”, shprehet ai.
Në botë ka raste se si një vend është detyruar të ia paguaj një vendi tjetër dëmin e luftës, si Gjermania e cila akoma paguan për dëme të luftës./FrontOnline/
