Eksperti amerikan për Ballkan dhe Diplomati i karrierës në Departamentin e Shtetit Amerikan, Michael Carpenter, ka komentuar takimin e krerëve të institucioneve të Kosovës dhe Serbisë që pritet të mbahet më 27 qershor në Shtëpinë e Bardhë në Uashington.

Carpenter, i cili është edhe përkrahës i kandidatit për president të Shteteve të Bashkuara të Amerikës (ShBA), Joe Biden, përmes një postimi në llogarinë e tij në Twitter, ka thumbuar presidentin aktual të Amerikës, Donald Trump, shkruan Gazeta Insajderi.

Diplomanti amerikan, ka shtuar një pyetje se çfarë ka vendosur Trump në tryezë duke e ditur se Kosova dhe Serbia janë duke kërkuar anëtarësimin në Bashkimin Evropian.

“Së pari Macron thotë se ai dëshiron të organizojë një samit në mes Kosovës dhe Serbisë në Paris, më pas Trump nënshkruan me njoftimin e tij të samitit ndërsa qëllimisht rrëzon BE-në. Megjithatë, ajo që dëshirojnë të dy palët, përveç sovranitetit, është anëtarësimi në BE. Pra, çfarë saktësisht po vendos Trump në tryezë?”, ka shkruar Carpenter.

Gjatë ditës së djeshme, i dërguar special i presidentit të ShBA-së, për dialogun, Richard Grenell, ka konfirmuar datën e diskutimit për dialogun Kosovë Serbi në Uashington.

Përmes një postimi në llogarinë e tij në Twitter, Grenell ka bërë të ditur se një takim në mes të politikanëve kosovarë dhe serbë do të bëhet në Shtëpinë e Bardh më 27 qershor, shkruan Insajderi.

“Lajm i madh. Kam marrë zotimin nga qeveritë e Kosovës dhe Serbisë që përkohësisht ta pauzojnë fushatën e mosnjohjes dhe kërkesën për anëtarësim ndërkombëtar në mënyrë që të takohen në Uashington, në Shtëpinë e Bardhë, më 27 qershor për të biseduar rreth dialogut”, shkruan Grenell.

Grenell ka thënë se nëse secila palë është e pakënaqur me diskutimet e 27 qershorit, ata do të kthehen në status-quo pasi të largohen nga Uashingtoni.

“Siç kemi thënë vazhdimisht, së pari duhet të përparojmë në rritjen e ekonomive. Ky është fokusi. Mezi pres këto diskutime”, është shprehur Grenell.

Ndërsa, sot në Prishtinë pritet të mbërrijë i dërguar i Bashkimit Evropian (BE), për dialogun Kosovë Serbi, Miroslav Lajçak.

Zyra e Bashkimit Evropian në Kosovë ka bërë të ditur se përfaqësuesi i posaçëm i BE-së për dialogun Kosovë-Serbi, Miroslav Lajçak do të qëndrojë në Prishtinë në një vizitë tri ditore. Ai vjen në Kosovë për të diskutuar për rifillim të shpejtë të dialogut.

Presidenti i vendit, Hashim Thaçi ka thënë se Lajçak është i mirëseardhur nëse e kupton që Kosova është shtet sovran dhe i pavarur, ndërsa kryeministri Avdullah Hoti ka konfirmuar se do ta pres në takim për t’i paraqitur qëndrimin e qeverisë rreth çështjes së dialogut.