Opozita do t`i përgjigjet pozitivisht ftesës së ish-kryetarit të Kuvendit, Glauk Konjufca, për takim me liderët e partive politike, ku do të diskutohet për përgatitjen e seancës konstitutive të legjislaturë së nëntë.

Përfaqësuesit e PDK-së, LDK-së dhe AAK-në kanë bërë me dije se do të marrin pjesë në takimin e së martës.

Zyrtarët e këtyre partive kanë bërë me dije se një takim i tillë është i paraparë me Rregulloren e Punës së Kuvendit të Kosovës.

Sekretarja e Përgjithshme e PDK-së, Vlora Çitaku, ka thënë për gaztën Nacionale se PDK-ja do të jetë në këtë takim.

“Po, do të marrim pjesë. Me rregulloren e re të Kuvendit, ish kryetari i fton partitë parlamentare për konsultime për rendin e ditës për seancë”, ka thënë Çitaku.

Megjithatë, ajo ka thënë se PDK-ja ende nuk ka vendosur se kush do të shkojë në këtë takim.

Edhe deputeti i LDK-së, Ekrem Hyseni, ka bërë me dije se kjo parti do t`i përgjigjet pozitivisht ftesës së Glauk Konjuca.

Ai ka bërë me dije se kjo ftesë nuk është nga LVV-ja, por është ftesë që parashihet me Rregulloren e Punës së Kuvendit të Kosovës.

Në një prononcim për RTK21, ai ka treguar se cili është qëllimi i këtij takimi.

“Absolutisht, po. Kjo ftesë e kryeparlamentarit nuk është ftesë e subjektit të LVV-së, por është ftesë institucionale të cilën e rregullon rregullorja e funksionimit të Kuvendit, ku thotë se kryeparlamentare fton partitë në takim konsultativ për të caktuar rendin e ditës dhe njëkohësisht rendin e ditës dhe ulëset e deputetëve dhe çështjet e tjera që funksionojnë në mbarëvajtjen e seancës së parë. LDK-ja do të marrë pjesë në takim me kryeparlamentarin Konjufca sepse konstituimi i legjislacionit të ardhshëm bëhet përmes rregullores dhe ligjeve në fuqi”, ka thënë Hyseni.

As AAK-ja e Ramush Haradinajt nuk do ta refuzojë këtë takim.

Deputeti i AAK-së, Bekë Berisha, ka thënë se kjo partia do t`i përgjigjet pozitivisht ftesës së ish-kryeparlamentarit Glauk Konjufca.

“Sigurisht e kemi obligim që partitë politike , sigurisht që do të marrë pjesë edhe Aleanca”, është shprehur Berisha.

Presidentja e Kosovës, Vjosa Osmani, e ka caktuar 15 prillin si datë për mbajtjen e seancës konstituive për legjislaturën e nëntë.

Përgatitjet për këtë seance, sipas Rregullores së Punës së Kuvendit, i takojnë kryetarit të legjislaturës së kaluar, Glauk Konjufcës. Ky i fundit, së paku pesë ditë para seancës duhet të thërrasë një takim me krerët e partive që kanë fituar ulëse në Kuvend, për të diskutuar rendin e ditës dhe ndarjen e vendeve në sallë.