Anëtari i Komisionit Qendror Zgjedhor nga radhët e PDK, Arianit Elshani, ka ftuar qytetarët e Kosovës në diasporë që të bëjnë kujdes dhe të regjistrohen për votim vetëm përmes faqes zyrtare të KQZ.

Ai i ka ftuar diasporën që mos të bien pre e mashtrimeve të dy faqeve online që sot janë lansuar nga persona ende të panjohur e që kanë për qëllim vjedhjen e të dhënave personale.

Ai tha se KQZ si institucion ka kërkuar nga Policia e Kosovës të hetojë dhe të sjell para drejtësisë keqbërësit që po synojnë manipulimin e votuesve në diasporë.

Deklarata e plotë e Arianit Elshanit:

Sot gjatë ditës si përfaqësues i PDK-së në KQZ jam njoftuar për dy aplikacione për votimin nga jashtë, që po qarkullojnë nëpër rrjete sociale. Këto dy aplikacione, as nuk janë zyrtare e as nuk janë të mbështetura nga KQZ.

Prandaj edhe kemi reaguar si KQZ duke ftuar policinë për të identifikuar dhe ndalur keqpërdorimin që mund të bëhet me të drejtën e votës së bashkëatdhetarëve tanë. Po tentohet vjedhja e të dhënave personale që mbrohen me ligjet e Kosovës dhe legjislacionin e Bashkimit Evropian.

Ky aplikacion rrezikon integritetin e çdo vote dhe çdo të dhëne personale të qytetarëve që jetojnë jashtë vendi, e që mund të bien pre e keqpërdorimit nga tendencat e këqija politike duke ndryshuar vullnetin e diasporës.

Ne të gjithë kemi qenë dëshmitarë të keqpërdorimit dhe abuzimit që i’u është bërë votës nga jashtë në zgjedhjet e 2017 dhe 2019, prandaj ftoj diasporën tonë të përdorin vetëm formularin zyrtar të KQZ-se dhe linkun zyrtar për aplikim dhe mbështes organet e drejtësisë dhe sigurisë që të hetojnë deri në fund se kush qëndron prapa këtyre aplikacioneve që mund të abuzojnë votën e diasporës.