Dega e PDK’së në Prishtinë sot ka propozuar që transporti publik në kryeqytet të jetë pa pagesë nga muaji nëntor deri në mars.
PDK thotë se këtë propozim e ka bërë për të ulur ndotjen e ajrit në kryeqytet dhe për të parandaluar përhapjen e COVID-19.
Asambleistja e PDK-së, Suzana Vuqitërna-Kika, ka thënë se personat me sëmundje kronike janë më të prekshëm nga sëmudnjet sekondare, siç janë gripi dhe infeksionet.
“Një numër gjithnjë e më i madh njerëzish të ekspozuar ndaj ndotjes së rëndë të ajrit vuajnë nga sëmundje të identifikuara si sëmundje që rrisin ndjeshmërinë ndaj COVID-19. Personat me probleme kronike të mushkërive dhe zemrës të shkaktuara ose të përkeqësuara nga ekspozimi afatgjatë ndaj ndotjes së ajrit, në përgjithësi janë më të prekshëm nga sëmundjet sekondare, siç janë gripi ose infeksionet. Dy faktorët kryesorë në lidhje me COVID-19 janë rreziku i marrjes së sëmundjes më shpejt sesa personat e shëndetshëm, dhe rreziku i shfaqjes së një reaksioni më të rëndë kur merret sëmundja. Prandaj, ulja e ndotjes së ajrit mund të ndihmojë në uljen e ashpërsisë se virusit”, deklaron ajo.
Nënkryetari i PDK-së në Prishtinë, Ilirik Musliu tha se PDK në Prishtinë duke e parë që qytetarëve po ju kanoset edhe një rrezik tjetër shëndetësor, ai i përhapjes së sëmundjeve respiratore ka menduar një zgjidhje me efekt të menjëhershëm, por që është edhe afatgjatë, ofrimin e shërbimeve të transportit publik falas nga muaji nëntor deri në muajin mars për të gjithë qytetarët e Prishtinës.
Nënkryetari i PDK’së në Prishtinë, Ilirik Musliu, ka thënë se ofrimi i transportit publik pa pagesë, do të ulte problemin e komunikacionit të ngarkuar dhe do të ulte ndotjen e ajrit.
“Nga analizat që kemi bërë kjo do të ishte zgjidhja më efikase. Në studimet e fundit gjatë një dite në ora 10 të paradites, me një incizim satelitor është konstatuar se në qytetin e Prishtinës ishin 120.000 vetura të pranishme në trafik, pa i llogaritur ato që kanë qenë të parkuara brenda në garazhe”, tha ai.
“Pra, brenda ditës në Prishtinë hyjnë dhe dalin prej 70.000 – 100.000 vetura, të cilat emetojnë gazra ndotës në ambient. Nëse secila nga to shpenzon vetëm 2 litra derivate brenda qytetit, atëherë imagjinojeni sa litra derivate shpenzohen brenda qytetit në vetëm një ditë. Përveç emetimit të gazrave ndotëse, imagjinojeni shumën e parave që shpenzohen në derivate. Meqenëse bileta e autobusit aktualisht kushton 40 cent për një drejtim, pra 80 cent për vajtje-ardhje dhe familjet tona i kanë mesatarisht 4 anëtarë atëherë i bie që një familje të shpenzojë 3 euro e 20 cent brenda një dite për transport publik ose 96 euro brenda një muaji apo 384 euro për 4 muaj”, ka thënë ai.
