Avni Bytyçi, zëdhënës i PDK-së, thotë se në takimin e Qeverisë u propozua pothuajse i njejti buxhet si në vitin 2019.

Bytyçi thotë se argumenti i ministres së Financave, Hykmete Bajrami se rritja ekonomike më 2021 do jetë mbi 5% është bast më i rrezikshëm se fjalët e ish ministrit Besnik Bislimi për uljen e papunësisë.

Ai shkruan se kjo qeveri përveç që po vjedh paratë nga thesari po na e fyen logjikën e shëdoshë me këto propozime.

“Institucionet kombëtare dhe ndërkombëtare (BB dhe FMN) kanë paralajmëruar një tkurrje të ekonomisë së Kosovës deri në -8.8% të BPV-së, ndërsa odat ekonomike na kanë njoftuar se humbjet e ekonomisë së Kosovës, janë mbi 1.2 miliard euro në sektorin privat deri në këtë fazë“, shkruan Bytyçi.

Postimi i tij i plotë:

Sot, në një takim të Qeverisë, paskan propozuar buxhet prej 2.4 miliardë euro. Pothuajse i njëjti buxhet si për vitin 2019.

Vetëm se këtu e kemi një problem, ne jemi në mes një pandemie globale dhe një recesioni global ekonomik që nuk ka shtet të pa prekur.

Sipas ekspertëve shëndetësorë, pandemia do të zgjas më së paku deri në verën tjetër me parashikimin më optimist, ndërsa rehabilitimi i ekonomisë globale, fillon më së largu në mes të vitit 2021.

Argumenti i Ministrisë së Financave, të znj. Hykmete se rritja ekonomike për vitin 2021 do të jetë mbi 5% është një bast më i rrezikshëm se sa budallallëku i ish ministrit Besnik Bislimi për uljen rekord të papunësisë gjatë pandemisë. Rritja “V” i ekonomisë në rrethanat aktuale e me këtë trend është jo-real. E sidomos i paqartë është argumenti se 16% e rritjes (tek 5% BVP-së për vitin 2021) buron nga investimet, ndërsa në propozimin zyrtarë shohim rreth 120 milion euro më pak në kategorinë e investimeve kapitale.

Kjo qeveri, jo vetëm që po na i vjedh paratë nga thesari, por edhe po na e fyen logjikën e shëndoshë me këto propozime.

Përndryshe, institucionet kombëtare dhe ndërkombëtare (BB dhe FMN) kanë paralajmëruar një tkurrje të ekonomisë së Kosovës deri në -8.8% të BPV-së, ndërsa odat ekonomike na kanë njoftuar se humbjet e ekonomisë së Kosovës, janë mbi 1.2 miliard euro në sektorin privat deri në këtë fazë.

Në këto momente, bota është duke u mbyllur prapë, për shkak të pandemisë, ndërsa tregjet botërore janë në rënie të lirë, ndërsa ekonomitë e vendeve më të fuqishme janë në tkurrje e sipër.

Andaj, z. Kryeministër, ku do t’i merreni këto para, edhe nëse ky propozim është i zbatueshëm pse atëhere mungojnë investimet e mëdha kapitale për vitin 2021?