Po bëhen më shumë se dy muaj prej kur Lëvizja Vetëvendosje njoftoi zyrtarisht që ka nisur mocion mosbesimi ndaj Qeverisë së udhëhequr nga Avdullah Hoti.

Edhe pse kjo parti, më 6 gusht të këtij viti njoftoi se i ka votat e Grupit Parlamentar të VV-së, për rrëzimin e Qeverisë, atyre po u duhet edhe mbështetja e partisë së dytë opozitare, pra Partisë Demokratikë të Kosovës, shkruan Front Online.

Ndonëse VV-ja pati ftesë publike për PDK-në, për t`i dhënë votat për këtë mocion, këta të fundit nuk po e marrin seriozisht ftesën e VV-së.

Deputeti i PDK-së, Kujtim Gashi, tha për Front Online, që kjo iniciativë e VV-së për rrëzimin e Qeverisë “Hoti”, është shoë mediatik.

“ Ne e kemi të përcaktuar qartë qëndrimin e partisë sonë. Jemi deklaruar më parë dhe nuk kemi ndryshuar qëndrim e as deklaratat që i kemi pasur . Ky mocion është një iniciativë e llojit të show-it mediatik për faktin se për këtë iniciativë nuk janë konsultuar me askënd“, ka thënë deputeti.

Ndër të tjera Gashi foli edhe për diskutimet që janë bërë brenda PDK-së për mocionin.

“Ata thjeshtë neve për t`ua dhënë nënshkrimet na kanë ftuar përmes mediave. Kështu ne nuk e kemi parë shumë serioze këtë iniciativë dhe përkundrazi ne e kemi parë që ky ka qenë zotim i tyre më shumë për konsum ditor dhe për me shpërfaq politikën e tyre mediatike që e kanë zakonisht. Kështu ne si të tillë nuk e kemi marrë serioze “, ka deklaruar ai.

Të njëjtën gjë e ka pohuar edhe deputeti tjetër i PDK-së, Ferat Shala.

Ai tha për Front Online, se çështja e mocionit nuk ka qenë asnjëherë temë diskutimi brenda partisë.

“Jo. Kjo nuk ka qenë asnjëherë temë e diskutimit brenda partisë dhe as nuk e kemi për temë aktualisht. Çfarë thonë ata është çështje e politikës ditore, por nuk kemi ndonjë qëndrim as konsultim brenda partisë për këtë çështje“, ka thënë Ferat Shala për Front Online.

Në ndërkohë më herët nga zyrtarë brenda PDK-së, është potencuar se mocioni do të votohet nga PDK-ja në rast se i njëjti vie për votim në Kuvend.

Por, nga kjo parti është theksuar se këto vota nuk do të jepen para seancës që do të ftohet pikërisht për këtë çështje. /Front Online.