Më e vogla nga tri partitë në bisedime për të formuar qeverinë e ardhshme të Austrisë ka lënë papritur negociatat, duke i lënë në rrëmujë përpjekjet për të formuar një koalicion qeverisës të qendrës pa Partinë e Lirisë së ekstremit të djathtë (FPÖ).

Lëvizja e papritur e partisë liberale Neos ngriti dyshime serioze për të ardhmen e bisedimeve të koalicionit dhe nxiti FPÖ-në euroskeptike, miqësore me Rusinë. FPÖ ka qenë kundër këtyre negociatave, pavarësisht se fitoi zgjedhjet e fundit parlamentare në shtator me 29% të votave, shkruan The Guardian

Edhe pse FPÖ-së do t’i duhej një partner koalicioni për të qeverisur dhe asnjëri nuk është e afërt me të, sondazhet tregojnë se mbështetja për këtë parti është rritur pasi u la anash dhe kështu presioni për të gjetur një zgjidhje është rritur për dy partitë e mbetura në bisedime – atë të kancelarit konservator Karl Nehammer, Partia Popullore (ÖVP) dhe Social Demokratët (SPÖ).

“Ne Neos nuk do të vazhdojmë negociatat për një koalicion të mundshëm tre-partiak”, tha lideri i tyre, Beate Meinl-Reisinger, në një konferencë shtypi, duke akuzuar partitë e tjera për mungesë të guximit për të marrë vendime të guximshme, duke përfshirë takimin e tyre të fundit.

Neos mbështet shkurtimet e taksave dhe reformat strukturore, duke përfshirë idetë jopopullore si rritja e moshës së daljes në pension. Duke mos qenë kurrë në qeverinë kombëtare, ata e paraqesin veten si modernizues për dallim nga SPÖ dhe ÖVP, parti tradicionale të pushtetit.

Lëvizja e së premtes nënvizoi vështirësinë në rritje të formimit të qeverive të qëndrueshme në vendet europiane, si Gjermania dhe Franca, ku e djathta ekstreme ka qenë në rritje, por shumë parti nuk duan të bashkëpunojnë me to.

Nuk kanë mbetur shtigje të lehta në Austri.

“Ata të përfshirë kanë zgjedhjen midis Scylla dhe Charybdis”, tha analisti politik Thomas Hofer.

“Ata tani duhet të zgjedhin midis opsioneve shumë, shumë të këqija”.

Nëse të dy mund të arrijnë një marrëveshje është e paqartë duke pasur parasysh dallimet e tyre në çështjet përfshirë taksat. ÖVP është zotuar të mos rrisë taksat ndërsa politika kryesore e SPÖ është të taksojë pasurinë dhe trashëgiminë, të cilën ÖVP e refuzon.