Pakënaqësi me faturat e fundit të energjisë elektrike kanë shfaqur qytetarët e vendit.

Shumë prej tyre këto pakënaqësi i kanë shfaqur duke i publikuar faturat nëpër rrjete sociale.

Ata janë ankuar se fatura e këtij muaji është shumë më e lartë se ajo paraprake, ndonëse thonë se kanë shpenzuar njëjtë.

Partitë opozitare në vend po kërkojnë hetim për këtë çështje.

Hetim po kërkon edhe Këshilli për Mbrojtjen e të Drejtave dhe Lirive të Njeriut.

Deputeti i AAK-së, njëherit anëtar i Komisionit për Ekonomi, Pal Lekaj thotë për Front Online se faturat e muajit dhjetor janë shumë të larta dhe se sipas tij ky është rast për hetim.

“Faturat e larta në këtë muaj mund të jenë rast për hetim, pasi duke i njohur këto dy organe përgjegjëse, ndoshta ka pasur tendenca për manipulime me qytetarët. Uroj që Prokuroria dhe institucionet tjera relevante ta zbardhin të vërteten mbi këto fatura të rënda për gjepin e qytetarëve”, ka thënë Lekaj për Front Online

Sipas deputetit Lekaj çmimi i energjisë elektrike është shumë i lartë në krahasim me të ardhurat dhe pagat e qytetarëve të Kosovës.

Faturat e “fryra” të energjisë elektrike/ Lekaj: Faji qëndron tek ZRrE-ja dhe Qeveria

Deputeti i AAK-së, Pal Lekaj fajin për fatura të shtrenjta të energjisë elektrike ia hedh Zyrës së Rregullatorit të Energjisë dhe Qeverisë.

Ai, thotë se janë pikërisht këto dy institucione që e rritën çmimin e energjisë.

“Faji qëndron tek ZRRE-ja dhe Qeveria e Kosovës të cilat e rritën çmimin e energjisë, krijuan rregulla të reja të faturimit jo të duhura dhe jo të përshtatshme për qytetarët”, është shprehur Lekaj për Front Online.

Madje, akuzon Qeverinë që në pamundësi të investimeve të reja e ndërtime të termocentraleve, ka bërë kalkulime për interesa të veta.

“Qeveria e Kosovës në pamundësi të ideve dhe strategjive për investime të reja e ndërtime të termocentraleve, ajo bëri kalkulime për interesa të saj me të vetmin qëllim që të menaxhojë krizën energjetike dhe dështimin në sektorin e energjisë”, ka deklaruara ai.

Deputeti Lekaj, ka thënë se edhe si parti por edhe si anëtar i Komisionit ka kundërshtuar fuqishëm shtrenjtimin e energjisë, por se nuk është marrë parasysh.

Në zyrën e Rregullatorit të Energjisë deri sot janë dorëzuar 22 ankesa nga konsumatorët./Front Online