Kryetari i Aleancës Kosova e Re është deputeti i vetëm i kësaj partie në Kuvendin e Kosovës, në Grupin Parlamentar të Lidhjes Demokratike të Kosovës.

Po, ashtu është i vetmi kryetar i partisë që nuk është takuar më kryeministrin Albin Kurtin dhe kandidaten për deputete, Vjosa Osmanin, shkruan Front Online.

Pacolli nuk ishte për një kohë në Kosovë, çka iu pamundësua edhe pjesëmarrja në seancën e zgjedhjes së Qeverisë.

Por, tani kur po diskutohet çështja e presidentit, Pacolli është kthyer në Kosovë.

Këtë e ka konfirmuar për Front Online këshilltari i tij, Naim Murseli.

Ai ka deklaruar se Pacolli dhe Abdixhiku do të takohen gjatë javës, para seancës për votimin e presidentit për të diskutuar për këtë çështje.

Më tutje Murseli tha se Pacolli, deri më sot nuk ka pasur ftesë për të diskutuar për këtë çështje.

“Po z. Pacolli është në Kosovë. Gjatë javës, para seancës për votimin e Presidentit ai pritet të takohet me kryetarin e LDK-së, për të diskutuar për këtë çështje. Deri sot z. Pacolli nuk ka pas kërkesë për të votuar Znj. Osmani nga askush”, ka thënë ai për Front Online.

Një ditë më parë Lidhja Demokratike e Kosovës në një takim për më shumë se dy orë ka vendosur që të qëndrojë në sallë në ditën kur hidhet në votim Vjosa Osmani për presidente.

Kryetari i kësaj partie, Lumir Abdixhiku ka deklaruar se pres nga secili deputet të sillet si institucionalist, dhe nëse ka nevojë të kapërcejë edhe veten./Front Online/