Kryetarja e Kuvendit të Kosovës, Vjosa Osmani shkruan se të mbijetuarat e dhunës seksuale janë viktimë e krimit por edhe viktimë e paragjykimeve nga shoqëria.

Kjo është arsyeja se pse ato zgjedhin t’i vuajnë pasojat emocionale e traumatike në heshtje e izolim, thotë Osmani.

Osmani thotë se këto gra nuk janë vetëm, ato kanë mbështetjen e organizatave. Por ne mbështetësit e tyre jemi të paktë në numër thotë Osmani.

Të jesh me to do të thotë të kërkosh çdo ditë me ngulm drejtësi, tha ajo.
Ky është postimi i saj i plotë:Të mbijetuarat e dhunës seksuale në luftë janë viktima të dyfishta: së pari janë viktimë e vetë krimit, e së dyti, viktima të paragjykimeve nga shoqëria, sa që një pjesë e madhe zgjedhin t’i vuajnë pasojat emocionale e traumatike në heshtje e izolim të plotë. E mbi të gjitha, ato duan drejtësi.
Këto gra nuk janë vetëm! Në njërën anë, ato kanë mbështetjen e organizatave si Medica Gjakova, të cilën e vizituam këto ditë, e organizatave të tjera simotra që nuk reshtin së rezistuari çfarëdo presioni, e në anën tjetër, na kanë ne të cilët ju përkulemi përpara qëndresës së pashoq përballë dhimbjes e vuajtjes që ato përjetojnë. Por ne mbështetësit e tyre jemi ende të paktë në numër. Kjo nuk ka të bëjë vetëm me mbështetje, por ka të bëjë me kuptimin e vërtetë të vuajtjes e pasojave shkatërruese shumëdimensionale të luftërave. Të jemi aty për të mbijetuarit, do të thotë të jesh aty për t’u ballafaquar plotësisht me të kaluarën, për të udhëhequr shoqërinë tonë drejt një rehabilitimi të shëndoshë, solidar, e me me mirëkuptim të plotë për vuajtjet e brengat e secilës e secilit. Mbi të gjitha, të jesh me to, do të thotë të kërkosh çdo ditë e me ngulm DREJTËSI.