Nga 30 marsi i vitit të kaluar 2021 e deri tash janë gjithsej 626 tenderë në vlerë rreth 200 milionë euro, të cilët janë bllokuar në Organin Shqyrtues të Prokurimit (OSHP).

Shkak për këtë grumbullim kaq të madh të ankesave është mosfunksionalizimi i bordit të këtij institucioni, tash e gati një vit.

“Ekspertët i kanë shqyrtuar të gjitha këto ankesa dhe kanë nxjerr aktet përcjellëse për të gjitha këto lëndë, të cilat janë pa vendime në mungesë të bordit”, thanë nga OSHP për “Front Online”.

Disa javë më parë në Kuvendin e Kosovës dështoi për të dytën herë votimi për emërimin e pesë anëtareve të Bordit të Organit Shqyrtues të Prokurimit.

Si pasojë, Qeveria rihapi konkurs për të tretën herë, raporton “Front Online”.

Në konkursin e hapur për përzgjedhjen e kryetarit dhe katër anëtarëve të OSHP-së, zyra e kryeministrit ka pranuar mbi 20 kandidatura.

Nuk është hera e parë që Gjykata e Tenderëve jetë pa bord.

Ngjashëm kishte ndodhur edhe në vitin 2016 dhe në vitet 2013/14.

Bllokada 7 muajshe ishte bërë shkak i grumbullimit të një numri të madh ankesash, raporton “Front Online”.

Si ato të 2016-s si ato të 2013/14-s nuk u trajtuan fare nga bordet që erdhën, ani se kishte tenderë që ishin nënshkruar jashtëligjshëm.

Front Online ka raportuar për tenderë kur komunat nuk e kanë pritur fare shqyrtimin e tenderit nga ana e OSHP-së.

Ajo e Gjakovës kishte nënshkruar një të tillë në vlerë 4 milionë euro, pavarësisht se eksperti i OSHP-së i kishte kërkuar që ta rikthejë në rivlerësim shkaku i disa shkeljeve./“Front Online”.