‘’Do të qeverisi me duar të pastra’’ ky ishte premtimi që kishte dhënë Albin Kurti, para se të bëhej kryeministër i Kosovës dhe para se ta merrte nën qeverisje Kosovën. Por pas ardhjes së tij në pushtet, gjërat kanë filluar të ndryshojnë e premtimet e dhëna para zgjedhjeve të marrin kahe tjetër.

Nga premtimi i një qeverisje me duar të pastra, po del në qeverisje ku thirren për intervistim nga Prokuroria e Shtetit ministra, zëvendësministra, ambasador e figura të afërta të këtij pushteti.

Se ka korrupsion serioz gjatë kësaj Qeverie e thonë edhe raportet ndërkombëtare të publikuara së fundmi.

Njëri nga raportet që theksoj korrupsion serioz gjatë Qeverisë Kurti, ishte ai i publikuar nga Depertamenti i Shtetit Amerikan ku thotë: Ligji ofron dënime penale për korrupsion nga zyrtarët, por Qeveria nuk e zbatoi ligjin në mënyrë efektive. Pati raportime të shumta për korrupsion në qeveri. Zyrtarët ndonjëherë përfshiheshin në praktika korruptive pa u ndëshkuar. Mungesa e mbikëqyrjes efektive gjyqësore dhe dobësia e përgjithshme në sundimin e ligjit kontribuan në këtë problem. Rastet e korrupsionit i nënshtroheshin rregullisht apelimeve të përsëritura dhe sistemi gjyqësor shpesh lejonte skadimin e parashkrimit.

Edhe raporti i publikuar nga Organizata ‘’Freedom House’’ vlerëson se Qeveria e Kosovës nuk ka shënuar përparim në ç’rrënjosjen e korrupsionit.

“Shumë institucione publike dëmtohen nga korrupsioni i ngulitur, ndonëse ka shenja se një gjeneratë e re politikanësh po ndërmarrin hapa për të luftuar praktikat korruptive nëpërmjet reformave ligjore dhe administrative. Korrupsioni dhe klientelizmi vazhdojnë të ndikojnë në përzgjedhjen e votuesve gjatë zgjedhjeve, sikurse edhe trysnia nga interesat e fuqishme të interesave të biznesit” thuhet në raportin e ‘’Freedom Hause’’

Ministrja e Tregtisë, Rozeta Hajdari, Ministri i Infrastrukturës, Liburn Aliu, Zëvendësministri i Infrastrukturës, Hysen Durmishi, Ambasadori i Kosovës në Kroaci, Martin Berishaj, ish-Kryeshefi i KEK-ut, i afërm me kryeministrin Albin Kurti, Nagip Krasniqi, po ashtu ishte intervistuar nga Prokuroria e Shtetit nën dyshimin për korrupsion.

Basha i VV-së: Dyshimet dhe hetimet e zyrtarëve nuk e dëmtojnë aspak punën e mirë të Qeverisë Kurti

Deputeti i VV-së, Dimal Basha, thotë për FrontOnline se intervistimet e zyrtarëve të lartë shtetëror por edhe të Qeverisë nga Prokuoria e Shtetit mbesin thjeshtë vetëm dyshime dhe se nuk e dëmtojnë aspak punën e Qeverisë Kurti.

‘’Ato mbesin vetëm dyshime dhe për këtë vetë zëvendësministri Durmishi ka dhënë sqarime për të. Jo more nuk e dëmtojnë këto punën e Qeverisë Kurti. Prokuroria ka pyetje, ndërsa Qeveria dhe ministrat kanë përgjigje për këtë. Ka hetime ata mundën me dyshu, ka pyetje ti përgjigjesh’’ thekson Basha.

Deputeti Basha e merr për shëmbull intervistimin e ministrit të Financave, Hekuran Murati për të cilin thotë se pas shumë dyshimeve, hetimet mbi të kanë pushuar dhe se nuk bën me e paragjyku dyshimin.

‘’Edhe ministrin Murtai e kanë intervistu mbi kallëzimin penal, por tash kanë pushuar hetime dhe nuk bën me paragjyku dyshimin asnjëherë si fajtor për shkak se qytetarët e dijnë se është Qeveri me duar të pastra. Ne nuk e kontrollojmë punën e drejtësisë’’ potencon ai.

Deputeti i pozitës thotë se askund nuk mund të gjendet se Qeveria ka ndërhyrë në punën e drejtësisë.

‘’Askund nuk e gjen që Qeveria ka ndërhyrë në sistemin e drejtësisë, ndërhyrje në sistemin e drejtësisë është kur ti e thirrë prokurorin dhe i thua me vendos favore në interesin tënd. Po, ne po kërkojmë punë me shumë nga ta dhe ne po kërkojmë një sistem me të mirë. Kritika nuk është ndërhyrje’’, përfundon deputeti Basha për FrontOnline.

Beqa i PDK-së: Qeveria aktuale është zhytur thellë në korrupsion

Deputeti i PDK-së, Hajdar Beqa, thotë për FrontOnline se Qeveria aktuale e udhëhequr nga kryeministri Albin Kurti është zhytur thellë në korrupsion, derisa këtë e tregojnë raportet ndërkombëtare sipas tij.

”Nuk i komentojmë qendrimet e VV-së, fatkeqësisht Qeveria aktuale e Kurtit është e zhytur thellë në korrupsion, ndërsa këtë po e tregojmë jo vetëm ne si opozitë, por po e tregojnë gjitha raportet ndërkombëtare, ai i DASH-it, ai i Freedom House, po ashtu edhe ai i ndërhyrjes në media’’, deklaron ai.

Beqa thotë se intervisimi i zëvendësministrit Durimishi dhe kush do që keqpërdor pozitën zyrtare duhet të përgjigjet

‘’Pastaj intervistimi i zëvendësministrit Durmishi dhe secili person që keqpërdor pozitën zyrtare duhet përgjigjet para drejtësisë’’ thekson ai.

Deputeti Beqa thotë se nuk është qeveria siç ka aluduar Kurti dhe se për të Kosova nuk ka pasur qeveri me të korruptuar se sa qeveria aktuale.

‘’Nuk është ajo Qeveria që ka aluduar Kurti, pra nuk ka pasur Kosova Qeveri me të korruptuar. Kemi raporte që e përmendin fjalën korruprison serioz në nivel qeveritar’’ përfundon Beqa për FrontOnline.

Azemi i LDK-së: Bashkëpunëtorët e Kurtit të dyshuar për korrupsion

Anëtari i Kryesisë së LDK-së, Visar Azemi, thotë për FrontOnline se zyrtarë e bashkëpunëtorë të kryeministrit Albin Kurti po intervistohen nga Prokuroria e Shtetit për aferat korruptive të tyre.

‘’Zyrtarë dhe bashkëpunëtorë të afërt të kryeministrit Kurti po intervistohen nga Prokuroria për aferat korruptive që është zhytur kjo Qeveri’’ deklaron  Azemi,

Azemi  thotë se Porkuroria duhet të bëjë punën e saj dhe të i zbardhë gjitha rastet që kanë filluar të hetohen.

‘’Organet e Prokurorisë duhet të bëjnë punën e tyre dhe ti zbardhin këto raste që kanë filluar’’ përfundon Azemi

Miftaraj: Ministrat dhe zyrtarët e dyshuar për korrupsion të dorëhiqen ose të shkarkohen

Drejtori i Institutit të Kosovës për Drejtësi dhe njohësi i çështjeve juridike, Ehat Mitaraj thotë për FrontOnline se duke u nisur nga retorika e kaluar Vetëvendosjes, ministrat dhe zyrtarët që janë duke u përballur me hetime penale e që lidhën me korrupsion do të duhej të dorëhiqen ose të shkarkohen.

‘’Sidoqoftë, duke marrë për bazë retorikën e LVV sa ka qenë në opozitë dhe parimet mbi të cilat ka ardhur në pushtet duke promovuar qeverisje me duar të pastra, atëherë pritjet legjitime janë që ministrat dhe pozitat e larta në qeveri ose institucione tjera ekzekutive që përballen me hetime penale që lidhen me korrupsion të dorëhiqen ose shkarkohen nga këto pozita’’, thotë Miftaraj.

Miftaraj tutje thotë se hetimet që po zhvillohen janë në fazën e hershme dhe nuk mund të konstatojnë në përgjegjësinë penale.

‘’Përderisa hetimet që është i zhvilluar PSRK janë në një fazë të hershme të procedurës penale nuk mund të konstatojmë përgjegjësinë penale të personave në fjalë duke respektuar edhe parimet e drejtësisë penale si është prezumimi i pafajësisë deri në një vendim final të gjykatës’’ thekson ai.

Ndërkohë, Miftaraj thotë se çdo sjellje ndryshe e lidershipit të VV-së, jashtë pritjeve legjitime ndërton standardin se kjo parti nuk dallon nga partitë tjera.

‘’Çdo sjellje e lidershipit të LVV-së jashtë këtyre pritjeve legjitime të ndërton standardin se kjo parti nuk dallon nga partitë tjera në opozitë duke vazhduar avazin e ofrimit të kulturës së pandëshkueshmerisë për personat që hetohen për afera korruptive’’ përfundon ai.