Opozita shqiptare ka njoftuar se do të zhvillojë sërish një protestë me bllokimin e disa akseve rrugore, më 26 nëntor, si një vazhdimësi e planit të tyre të “mosbindjes civile” në aksionin ndaj Qeverisë.
Lajmin e ka bërë të ditur kreu i Këshillit Kombëtar të Partisë Demokratike, Edi Paloka, i cili ka zbuluar këtë detaj nga skenari i protestës së radhës së opozitës.
Ai tha se edhe në këtë protestë do të bllokohen të gjitha rrugët e Tiranës, ku qytetarët do të marshojnë në akset kryesore të kryeqytetit, me qëllim paralizimin e qarkullimit.
“Sot do mblidhemi për protestën. Dua të jap një lajm: Protesta e radhës do jetë bllokim total i Tiranës, i rrugëve, i trafikut në Tiranë, në datën 26. Marshim në Tiranë i qytetarëve. Ky do të jetë qëllimi. Do vuajnë qytetarët, por më mirë të vuajnë një ditë, 1 javë, por do të shpëtojnë nga vuajtja që zgjat prej 12 vitesh dhe që mund të zgjasë akoma nëse nuk reagojmë”, ka treguar Paloka gjatë një interviste televizive në emisionin “Kjo Javë” në News 24.
Ndër të tjera, ai ka theksuar gjithashtu se në kohët e fundit (duke referuar edhe zgjedhjen e Donald Trump si President të SHBA-ve) ka ndryshuar edhe qëndrimi i ndërkombëtarëve në krahasim me PD-në.
Paloka nuk e shpjegoi qartë këtë gjë, por përmendi kryesisht dy rezoluta nga PPE dhe CDI, në mbështetje të demokratëve, të cilët kanë nisur të rregullojnë raportet e tyre me ndërkombëtarët.
Duke u kthyer te protesta e pritshme, ajo do të jetë e ngjashme me atë të 29 tetorit, kur opozita bllokoi jo vetëm nyja kryesore qarkullimi në Tiranë, por edhe në disa rrethe.
Megjithatë, nuk pati incidente në këtë lloj demonstrate nga PD-ja dhe aleatët e saj, ku qytetarët kryesisht u treguan mirëkuptues për bllokimin e shkaktuar dhe nuk krijuan përplasje.
Edhe përplasjet e mundshme me Policinë u evituan dhe me disa orë trafik të paralizuar në kryeqytet dhe me akse të bllokuara, gjithçka u përmbyll paqësisht.
Trafiku u devijua aty ku ishte mundësia nga forcat e rendit, ndërsa masa kishin marrë edhe vetë qytetarët, të cilët në shumicë kishin shmangur kalimin në pikat kyçe të qarkullimit, si hyrjet kryesore në kryeqytet dhe disa akse të mëdha.
Duke parë eksperiencën e kaluar, manifestimi opozitar pritet të nisë rreth orës 17:00 dhe mund të zgjasë për dy-tre orë.
