Këshilli Prokurorial i Kosovës është bërë edhe me dy vetura të reja me kilometrazh 00.

Ato janë prodhim i vitit 2021. Vlera e përbashkët e tyre arrin shifrën e gati 90 mijë eurove, shkruan “Front Online”.

Këto të holla ky organ do t`i derdh në arkën e kompanisë, “Reforma”, e cila u rekomandua për kontratë sot në tenderin që u hap pikërisht për këtë arsye më 22 tetor 2021.

Në fakt ajo ishte e vetmja që ofertoi për kryerjen e këtij shërbimi.

“Audia në qese” 

“Front Online” ka dërguar pyetje në adresë të Këshillit Prokurorial të Kosovës për të pyetur se për çfarë marke të veturave bëhet fjalë dhe tipin.

Por, pavarësisht premtimit, nuk kanë kthyer përgjigje gjatë ditës.

Sidoqoftë, “Front Online” nga burime të vetat merr vesh se bëhet fjalë për dy vetura Audi. Secila kushton nga 44.5 mijë euro.

Në fakt, edhe kompania, të cilës i është dhënë tenderi, merret vetëm me shitjen e veturave të kësaj marke.

Reforma është diler i autorizuar për shitjen e AUDI.

Kjo mund të vërehet lehtësisht në faqen e saj në Facebook.

Mbesin enigmë shoferët e “Audi-s”, luks i tepruar

Nga Këshilli Prokurorial nuk kanë treguar si për markën e tipin, as për kë saktësisht janë të porositura veturat.

Sidoqoftë, kushdo që do t`i ngasë ato do të ndihet goxha komod, shkruan “Front Online”.

Kjo pasi në specifikat e tenderit është kërkuar që veturat të jenë me shtof ose lëkurë brenda. Timoni me patjetër është kërkuar të jetë lëkurë dhe multifunksional.

E dekori apo interieri, alumin ose dru.

Blerja e këtyre veturave, veçse edhe të një më tepër, ishte paraparë edhe në planin e prokurimit të këtij Këshilli për vitin 2021. /“Front Online”.