Kandidati për kryeministër nga Koalicioni NISMA-AKR-PD, Fatmir Limaj, ka thënë se në Gjykatën Kushtetuese ka të punësuar që asnjë ditë nuk kanë punuar në gjykatë.
Ai kështu ka thënë në forumin FOL Hapur, duke shtuar se tani ka ardhur koha të dihet se kush mund të bëhet gjykatës në Kushtetuese, njofton Klan Kosova.
“Reformat në drejtësi janë të domosdoshme. Duke respektuar pavarësinë e drejtësisë, ne së bashku me ekspertë duhet të krijojmë kritere që masin performancën e gjyqtarëve dhe prokurorëve. Matja e tyre bëhet përmes ligjit”.
“Fatkeqësisht sot në Gjykatën Kushtetuese kemi njerëz që asnjë ditë nuk kanë punuar në gjykatë. Nuk kanë shkuar asnjëherë në gjykim në jetën e tyre”.
“Të punosh si gjykatës në Gjykatën Supreme është kulmi i karrierës profesionale së një juristi i cili ka kaluar nga një hetues tek një prokuror e deri tek majat e drejtësisë”.
“Tani ka ardhur koha që të dihet se kush mund të jetë gjykatës i Kushtetueses. Për ta zgjedhur një gjykatës aktualisht, kandidatët e bëjnë para shefave të grupeve parlamentare – para njerëzve që ndoshta nuk janë as jurisë”.
“Nuk mund të bëhet gjykatës i Kushtetueses nëse së paku nuk i ka kaluar pesë vjet duke punuar në Supremen”./Front Online/
