Kryetari i Komunës së Drenasit dhe njëherësh udhëheqës i degës së PDK-së në këtë komunë, Ramiz Lladrovci, ka reaguar pas zhvillimeve të fundit në parti rreth përzgjedhjes së kandidatit për kryetar komune për zgjedhjet lokale të 12 tetorit.

Në një postim publik, Lladrovci ka kritikuar mënyrën e organizimit të procesit, duke ngritur pikëpyetje mbi legjitimitetin e përzgjedhjes së kandidatit nga 43 anëtarët e Kryesisë së PDK-së, pa u përfshirë dega lokale e partisë.

“Pyetja që shtrohet është: A po votojnë për kryetarin e qytetarëve të Drenasit, apo për kryetarin e pëlqyer të Kryesisë së Partisë?”, ka shkruar ai.

Lladrovci ka theksuar se kontestimi i kandidaturës së tij nuk është i rastësishëm dhe vjen nga individë që, sipas tij, kanë dëmtuar partinë në zgjedhjet e vitit 2021 dhe që tashmë kanë krijuar subjekte të tjera politike.

“Unë jam gati për garë. Kam dëshmuar sukses me qeverisje lokale, me performancë të lartë dhe transparencë. Qytetarët e Drenasit do ta japin përgjigjen më të mirë”, ka shtuar ai.

Lladrovci ka kritikuar edhe ndikimin nga jashtë degës, duke i quajtur disa figura si “bedelë të vitit 2021 dhe 2025”, që po përpiqen të diktojnë përzgjedhjen e kandidatit për Drenasin.

Ai gjithashtu ka kërkuar nga Kryesia e PDK-së që të votojë me objektivitet dhe të mos bëhet pjesë e, siç tha ai, “një padrejtësie ndaj kandidatit kampion të performancës komunale”.

Në fund, Lladrovci përsëriti përkushtimin e tij ndaj PDK-së: “Dje, sot, nesër, PDK. Nuk ka bir nane që mund të më largojë nga PDK dhe vizioni i heronjve tanë të luftës dhe paqes!”.