Reperi Noizy, është në kërkim nga autoritetet e Kosovës, pasi që dyshohet se ditë më parë u përfshi në një përleshje me grupin e tij në një diskotekë në Pejë.

Policia ende nuk ka arritur që ta kapë atë, kurse sonte është paralajmëruar se do të jetë në diskotekën “Stop” në Gjilan, për të kënduar.

Në dijeni për këtë është edhe Policia e Gjilanit.

Organet e rendit paralajmëruan atë se do ta arrestojnë nëse e hasin diku.

Kjo u bë e ditur për Klankosova.tv nga zëdhënësi rajonal i policisë, Ismet Hashani.

“Ju njoftojmë se personi i apostrofuar nga ana e juaj është në kërkim policor dhe i njëjti në çdo moment që do të takohet nga ana e Zyrtarëve Policor pa marrë parasysh në cilin lokacion, ai do të arrestohet dhe dorëzohet në njësitin përkatës që është në kërkim të tij”, tha ai.

Dyshohet se javën e kaluar dy persona janë rrahur keq nga grupi i Noizyt, për çka edhe po kërkohet ky i fundit.

Ende nuk dihet se për çka saktësisht edhe deri tek ky incident.