Nisma Socialdemokrate e Fatmir Limajt është e gatshme të bashkëpunojë me të gjitha subjektet politike “për të mirën e vendit”.

Megjithatë, ajo nuk do të votojë asnjë qeveri për të cilën “nuk e ka marrë pjesën e saj të përgjegjësisë, tha sot anëtari i kësaj partie, Fatmir Matoshi.

Matoshi i tha Paparacit se Nisma nuk mund ta dijë se çfarë pret Albin Kurti për formimin e qeverisë së re, në një përgjigje ndaj raportimeve të mediave që sugjeronin se tre deputetë të Nismës do t’ia bëjnë LVV-së numrat për formimin e shumicës.

“Ne nuk mund ta dimë se çfarë pret Kurti”, tha Matoshi në një deklaratë për Paparacin të hënën. “NISMA nuk voton asnjë qeveri për të cilën nuk ka marrë pjesën e saj të përgjegjësisë”.

Portali Nacionale, të dielën në mbrëmje raportoi se Nisma Socialdemokrate “do ta votojë qeverinë e propozuar nga Lëvizja Vetëvendosje” pas stagnimit në përpjekje për unifikim në një bllok të katër partive opozitare.

Nacionale, duke cituar në një burim të mirëinformuar, raportoi se tre deputetë të Nismës “do t’ia votojnë qeverinë” Kurtit nëse dështon përpjekja opozitare për unifikim, por “pa hyrë në qeveri”.

Sipas raportimit të medias, Limaj tashmë ia ka bërë të qartë këtë qëndrim të saj lidershipit të Partisë Demokratike të Kosovës. Kandidati për kryeministër i PDK-së, Bedri Hamza tha të premten se gjatë javës së kaluar ka zhvilluar negociata me LDK-në, AAK-në dhe Nismën.

Matoshi tha se çështja e votimit të një qeverie me kryeministër Kurtin nuk është diskutuar brenda partisë.

“Nuk është diskutu kjo temë”, tha Matoshi.

Nisma ka shprehur pakënaqësi me angazhimin e deritashëm të subjekteve opozitare në përpjekje për krijimin e një blloku opozitar, i cili do ta dërgonte Kurtin në opozitë.

Por, Matoshi u bëri apel subjekteve opozitare për dakordim “mes vete sa më parë”.

“NISMA është e pakënaqur me angazhimin e partive të opozitës së deri tashme për të unifikuar qëndrimet për një bashkim të mundshëm dhe ju bëjmë thirrje që të dakordohen mes vete sa më parë”, tha anëtari i Nismës.

Kryeministri në detyrë Albin Kurti tha të dielën se Vetëvendosje synon që të krijojë qeverinë brenda të njejtës ditë kur pritet të konstituohet Kuvendi i Kosovës.

Këtë deklarim, Kurti e ka dhënë para mediave në takimin me rastin e Festës së Fitër Bajramit me myftiun e Bashkësisë Islame të Kosovës, Naim Tërnava.

“Pasi u certifikuan rezultatet, është një seancë ku jepen betimet edhe masnej synojmë një seancë ku zgjedhet edhe kryetari, kryesia e Kuvendit edhe Qeveria qysh e kena bërë edhe herën e kalume për të njëjtën ditë”, tha Kurti.

LVV ka siguruar 48 mandate në kuvend, PDK-ja 24, LDK-ja 20 dhe koalicioni AAK-NISMA tetë (AAK-ja pesë, Nisma tri). Lista Serbe do t’i ketë 9 deputetë, 1 ulëse nga komuniteti serb e ka fituar partia e Nenad Rashiqit.

Kur janë bërë pesë ditë prej se Komisioni Qendror i Zgjedhjeve certifikoi zgjedhjet parlamentare dhe qeveria e udhëhequr nga Albin Kurti ka marrë statusin e “qeverisë në detyrë”, kanë mbetur më së shumti 25 ditë kohë për thirrjen e seancës konstituive të kuvendit.

Neni 66 i Kushtetutës së Kosovës parasheh që seanca konstituive të mbahet brenda 30 ditësh nga certifikimi i rezultateve të Zgjedhjeve.

Paragrafi i Tretë i këtij Neni parasheh që seanca të thirret nga kreu i shtetit. Nëse presidentja Vjosa Osmani nuk vepron brenda këtij afati, Kuvendi i ri mblidhet vetë në ditën e 30-të.