Kandidati për deputet nga koalicioni AAK-Nisma-E30+, Artan Nimani, pas një vizite në fshatin Irzniq të Deçanit, ka ngritur shqetësime për gjendjen alarmante të stadiumit të këtij fshati, i cili dikur ka qenë një pikë takimi për të rinjtë dhe klubin zyrtar “Besa”.

Ai kritikoi ashpër Ministrin e Kulturës, Rinisë dhe Sporteve, Hajrulla Çeku, për deklaratat propaganduese në lidhje me mbështetje për sportin, duke theksuar se realiteti në terren është krejtësisht ndryshe.

“Ky është vetëm një shembull që demanton fjalët e ministrit Çeku. Deçani vazhdon të diskriminohet, siç ka ndodhur edhe gjatë periudhës së pushtimit serb, por tani edhe nën qeverisjen aktuale të kryeministrit Kurti”,ka shkruar Nimani.

Kandidati i koalicionit AAK-Nisma-E30+ e konsideroi këtë situatë si dëshmi të neglizhencës dhe premtimeve të pambajtura nga qeveria aktuale. Ai u shpreh se qytetarët e Deçanit dhe të gjithë Kosovës do të japin përgjigjen e duhur në zgjedhjet e 9 shkurtit, duke dërguar një mesazh të qartë për ndryshim.

“Sporti, rinia dhe gjithë Kosova do të fitojnë, sepse zhvillimi i një shoqërie nis nga përkushtimi ndaj brezit të ri dhe mbështetja për mundësitë e tyre. Stadiumi i fshatit Irzniq, si shumë të tjerë në vend, ishte i planifikuar të rinovohej dhe mirëmbahhej nga MKRS, por gjendja e tij sot është një dëshmi e qartë e dështimit të kësaj qeverie”, shkruan Nimani.

Ai përfundoi me një thirrje për përgjegjësinë e qeverisë dhe për ndëshkimin e keqqeverisjes më 9 shkurt: “Lavdi marrisë Ministër!”