Fshati Tsophi është një nga disa fshatrat e rajonit Marneuli të Gjeorgjisë ku armenët dhe azerët jetojnë dhe punojnë së bashku, pavarësisht konfliktit mes Armenisë dhe Azerbajxhanit për Nagorno-Karabakun.

Luftimet mes këtyre dy shteteve i kanë prekur emocionalisht edhe armenët dhe azerët që jetojnë në Gjeorgji, por fshatarët përpiqen që të mos grinden mes vete për këtë çështje, shkruan Free Europe, transmeton Gazeta Express.

Fshati gjeorgjian, Tsophi, shtrihet afër trekëndëshit kufitar Gjeorgji – Armeni – Azerbajxhan
“Për mua, lufta nënkupton vdekje, fund të jetës, fund të botës. Natyrisht, ndihem i lënduar, dhemb shumë. Pse tërë kjo gjakderdhje? A nuk munden ata që ta zgjidhin këtë në mënyrë paqësore”, thotë Nuradin Akhmedov, azer që jeton në këtë fshat.

Nuradin Akhmedov, azer etnik që jeton në fshatin Tsophi të Gjeorgjisë
Maksim Siradegian, armen që jeton në të njëjtin fshat, thotë: “Ushtarë të rinj po vdesin. Qytetarë paqësorë po bombardohen. Njerëzit po vdesin. Ata bombardojnë dhe djemtë tanë bombardojnë. Askujt nuk i nevojitet lufta, s’ka asnjë dobi prej saj.”

Maksim Siradegian, armen etnik që jeton në fshatin Sophi
Një banor tjetër, një i ri azer, i quajtur Elmir Anagiev, thotë se fshati ku ai jeton është mikëpritës dhe njerëzit janë të shoqërueshëm me njëri-tjetrin. “Një familje armene jeton në këtë ndërtesë, ne të tjerët jemi azerë. Në familjen time, ne flasim për luftën. Duam paqe dhe që gjakderdhja të ndalet”, thotë ai.

Elmir Anagiev, një i ri azer që jeton në të njëjtën ndërtesë me një familje armene
Banorët e fshatit Tsophi shpresojnë se të tjerët mund të mësojnë nga shembulli i tyre. Për ta, lufta është armiku i përbashkët.

Disa gra në një rrugicë të fshatit
Ndryshe, mbi 1.200 ushtarë armenë janë vrarë gjatë luftimeve që nisën me 27 shtator në Nagorno-Karabak, ndërsa forcat azere nuk e kanë publikuar numrin e ushtarëve të vrarë.