Plot një vit e tre muaj i janë dashur Gjykatës Themelore në Prishtinë që të caktojë fillimin e rigjykimit për rastin e njohur si “Stenta”. Rigjykimi ndaj ish-ministrit Ferid Agani dhe ish-sekretarit Gani Shabani do të fillojë më 23 mars të këtij viti.
Zyrtarja për informim në Gjykatën Themelore në Prishtinë, Mirlinda Gashi, ka konfirmuar se është caktuar data e rigjykimi kurse gjyqtari është caktuar Kujtim Krasniqi.
“Ju njoftojmë se seanca e shqyrtimit gjyqësor për rastin ku të akuzuar janë F.A. dhe G.SH. është caktuar të mbahet me datë 23 mars 2021 në ora 09.30, gjyqtar i kësaj çështje është gjyqtari Kujtim Krasniqi”, thuhet në përgjigjen për “Betimi për Drejtësi, të zyrtares Gashi,
Në këtë rast, për keqpërdorim të pozitës apo autoritetit zyrtar po akuzohen ish-ministri i Shëndetësisë, Ferid Agani dhe ish-sekretari i kësaj ministrie Gani Shabani. Të dy këta ishin shpallur fajtor në prill të vitit 2019. Agani ishte dënuar me dy vite e gjysmë burgim kurse Shabani me dy vite burgim.
Por, pas ankesave të ushtruara në gjykatën e shkallës së dytë, ky aktgjykim i Gjykatës Themelore në Prishtinë ishte anuluar nga Gjykata e Apelit në dhjetor të vitit 2019 dhe lënda ishte kthyer në rigjykim.
Që nga ajo kohë, kanë kaluar një vit e tre muaj, është ndërruar gjyqtari i lëndës. por nuk është mbajtur asnjë seancë.
Fillimisht, gjatë gjykimit të parë kjo lëndë ishte gjykuar nga një trup gjykues i kryesuar nga gjyqtarja Shadije Gërguri. Kjo e fundit, në korrik të vitit 2019 kishte kaluar në Departamentin Special të Gjykatës Themelore në Prishtinë.
Pas kthimit në rigjykim nga Apeli, kjo lëndë i ishte ndarë gjyqtarit Kujtim Krasniqi. Ende pa u mbajtur asnjë seancë te gjyqtari Krasniqi, edhe ky i fundit ishte avancuar në Departamentin Special të Gjykatës Themelore në Prishtinë.
Pas avancimit të gjyqtarit Krasniqi, lënda i ishte ndarë në punë gjyqtares Medie Bytyqi. Kështu të paktën thuhej në një përgjigje të datës 4 shkurt 2021, nga Gjykata Themelore në Prishtinë, për “Betimi për Drejtësi”.
Por, sipas një përgjigje tjetër që “Betimi nga Drejtësi” ka pranuar nga Gjykata Themelore në Prishtinë, më 5 mars 2021, rasti “Stenta” megjithatë do të vazhdojë të gjykohet nga gjyqtari Kujtim Krasniqi.
Ndryshe, Prokuroria e Shtetit, më 15 qershor 2016, kishte ngritur aktakuzë kundër ish-ministrit të Shëndetësisë, Ferid Agani, sekretarit të përgjithshëm të MSh, Gani Shabani dhe 62 personave të tjerë, për veprat penale “keqpërdorimi i pozitës apo autoritetit zyrtar”, “marrje e ryshfetit”, “dhënie e ryshfetit”, “trajtimi i pandërgjegjshëm mjekësor”, “ushtrimi i kundërligjshëm i veprimtarisë mjekësore dhe farmaceutike” dhe “shmangia nga tatimi “.
Më 26 shkurt 2018, ky rast ishte veçuar në tri pjesë, ashtu që të akuzuarit Agani dhe Shabani gjykohen veçmas, kurse mbi 40 mjekë të spitaleve publike akuzohen në rastin e njohur si “Stenta 2”, ndërsa pronarë e mjekë të spitaleve private akuzohen në rastin “Stenta 3”.
Ish-ministri Agani së bashku me ish-sekretarin e Ministrisë së Shëndetësisë, Gani Shabani, po akuzohen se kishin keqpërdorur pozitën e tyre zyrtare me rastin e lidhjes së marrëveshjeve të bashkëpunimit me spitalet private, si dhe me ndarjen e mjeteve për pacientët që ishin trajtuar në këto spitale.
Sipas aktakuzës, ekziston dyshimi i bazuar mirë se në periudhën kohore prej 1 janarit 2011 deri më 31 dhjetor 2015, të akuzuarit Agani dhe Shabani, duke vepruar në bashkëkryerje me njëri tjetrin dhe në bashkëpunim me të akuzuarit tjerë në këtë rast, Ali Hocaoglu dhe Borche Petrovski dhe duke shkelur ligjin e prokurimit publik kanë keqpërdorur pozitën e tyre.
Një gjë të tillë, sipas prokurorisë, i akuzuari Shabani në cilësinë e sekretarit të përgjithshëm në MSH, kishte nënshkruar marrëveshje bashkëpunimi për sigurimin e shërbimeve shëndetësore që nuk ofroheshin në institucione publike.
Këto marrëveshje ai pretendohet se i kishte nënshkruar me spitalet private International Medicine Hospital (IMH) dhe Intermed EDA, pa e shpallur tenderin për sigurimin e këtyre shërbimeve.
Ndërsa, vazhdon aktakuza, i akuzuari Agani në cilësinë e Ministrit të Shëndetësisë, pretendohet se nuk kishte penguar nënshkrimin e këtyre marrëveshjeve edhe pse kishin qenë në kundërshtim me ligjin e prokurimit publik., mirëpo, i njëjti kishte ndikuar tek i akuzuari Shabani që të bëhej nënshkrimi i tyre dhe pas nënshkrimit të këtyre marrëveshjeve kishin vazhduar keqpërdorimin e pozitës dhe autoritetit zyrtar duke i tejkaluar kompetencat e tyre, ku me dashje dhe dijeni nuk kishin marrë veprime të nevojshme për të furnizuar me materiale kardiologjinë invazive në QKUK, por përkundrazi, në bashkëpunim me Hocaoglun dhe Petrovskin, u kishin paguar spitaleve private IMH dhe Intermed EDA shumën prej 4,555,553.00 euro.
Më ketë, sipas aktakuzës, Agani dhe Shabani kishin kryer veprën penale të keqpërdorimit të pozitës apo autoritetit zyrtar, me çka kishin dëmtuar buxhetin e Kosovës në shumë prej 4,555,553.00 euro.
Të dy të akuzuarit, ishin deklaruar të pafajshëm në lidhje akuzat me të cilat ngarkohen në shqyrtimin fillestar të mbajtur më 26 shkurt 2018.
Ndryshe, kur janë bërë afër pesë vite që nga ngritja e aktakuzës në këtë rast, epilogu gjyqësor i kësaj aktakuze nuk duket as afër.
Përderisa rasti “Stenta 1”, kishte marr njëherë epilog në shkallë të parë dhe tashmë është kthyer në rigjykim, dy rastet tjera, “Stenta 2” dhe “Stenta 3”, ende mbesin në gjykim në shkallë të parë. Për rastin “Stenta 3”, është mbajtur vetëm një seancë e shqyrtimit gjyqësor, kurse në rastin “Stenta 2”, janë mbajtur disa seanca, porse çështja ende mbetet në fazën e dëgjimit të dëshmitarëve.
Në ketë çështje penale hetimet fillimisht janë zhvilluar kundër 116 personave fizikë dhe 4 personave juridikë. Mirëpo, për 56 persona fizikë nuk janë plotësuar kushtet ligjore që të përfshihen në këtë aktakuzë, andaj për të njëjtit janë pushuar hetimet. Pas ngritjes së aktakuzës, prokuroria kishte hequr dorë nga ndjekja penale ndaj kardiologut Afrim Bekteshi, me arsyetimin se i njëjti është përfshirë gabimisht në aktakuzë.
