Deputetja e PDK’së, Ganimete Musliu, ka thënë në emisionin Frontal të Televizionit 7 se ministri në detyrë i Shëndetësisë, Arben Vitia, do të jepte dorëheqje, por, sipas saj, nuk e ka lejuar kryeministri në detyrë, Albin Kurti.

Musliu thotë se pas vdekjes së Agon Musliut në Qendrën e Studentëve, ku ishte vendosur në karantinë, ministri Vitia do të jepte dorëheqje.

Sipas deputetes së PDK’së, Kurtit i pengonte popullariteti që Vitia e ka arritur dhe do ta arrinte edhe më shumë, nëse do të jepte dorëheqje morale.

“Ministria Vitia do të ofronte dorëheqjen pas vetëvrasjes së Agonit në Qendrën e Studentëve, por këtë gjë nuk e ka lënë ta bëjë Albin Kurti. Duhet ta pranojmë që Vitisë iu ngrit njëfarë popullariteti gjatë kësaj periudhe, prandaj, dorëheqja e tij morale do ta ngriste edhe më shumë autoritetin e tij dhe popullariteti i tij paraqet problem për Albin Kurtin”, ka thënë Musliu.

Ndryshe, ajo ka kritikuar sërish pranimin e testeve për Covid 19, që i ka dhuruar Serbia.