Mungesë vizioni për kompromisin që do të çonte në normalizim të marrëdhënieve mes dy vendeve kanë shfaqur Kosova dhe Serbia, edhe në edicionin e sivjetmë të Forumit të Sigurisë në Beograd, i cili përfundoi këtë javë.Krahas temave të tjera, nën sloganin “S’ka Besim – S’ka Paqe”, vëmendje e veçantë i është kushtuar dialogut Kosovë-Serbi, me panelin ku pjesëmarrës ishin kryeministri i Kosovës, Avdullah Hoti, presidenti i Serbisë, Aleksandër Vuçiq, dhe emisari i Bashkimit Evropian për dialogun, Miroslav Lajçak, raporton KOHA.
“Kjo ishte hera e parë që përfaqësuesit më të lartë të dy qeverive u takuan në një ngjarje të organizuar në rajon, së bashku me të dërguarin special dhe përfaqësuesin e BE-s dhe SHBA-s. Formate si ky kontribuojnë në ndërtimin e besimit, pa të cilin nuk mund të arrihet paqja e qëndrueshme. Por, fatkeqësisht, ngjarja konfirmoi se ende nuk ka vizion të qartë për kompromis”, ka thënë Marko Savkoviq, drejtor i Programit në BSF.
Mungesë besimi dhe qëndrime diametralisht të kundërta rreth marrëveshjes finale dhe ligjërisht të obligueshme kanë shfaqur udhëheqësit e Kosovës dhe Serbisë.Derisa Hoti ka përsëritur disa herë se marrëveshja e paqes duhet ta ketë njohjen e ndërsjellë, Vuçiqit i ka penguar kjo duke fajësuar Kosovën se po kushtëzon themelimin e Asociacionit me diçka që nuk është nënshkruar në Bruksel.
Problem tjetër është theksuar dobësimi i institucioneve demokratike dhe kapja e shtetit, duke përdor si justifikim situatën me pandeminë COVID-19.
Donika Emini nga Platforma Civikos, e cila ka prezantuar punimin “Promovimi i Stabilitetit dhe Lehtësimi i Kapjes së Shtetit”, ka thënë se Bashkimi Evropian reformat i ka fokusuar vetëm në stabilitet, por jo edhe në forcimin e demokracive të këtyre vendeve.“Komuniteti ndërkombëtar, përfshirë Bashkimin Evropian, duke kërkuar palë e liderë për dialog, kanë minuar rëndësinë e reformave në rajon.
Në shtetet e Ballkanit, udhëheqësit e elitave politike në pushtet përvetësuan të gjitha institucionet, duke mos lënë vend për opozitën”, ka thënë Emini.Shpopullimi i rajonit, rreziku nga esktremizmi i dhunshëm dhe integrimi i Ballkanit Perëndimor në Bashkimin Evropian, kanë qenë temat e tjera të diskutuara në forum.Për gjashtë ditë të edicionit jubilar janë mbajtur 24 panele me 92 folës dhe mijëra pjesëmarrës e ndjekës aktivë në internet.
