Faruk Mujka, drejtor i Ndërmarrjes Hidroekonomike “Ibër Lepenci”, e ka dënuar shpërthimin që është bërë në kanalin e ujit të Ibër-Lepencit, në fshatin Varagë të Zubin Potokut.
Për Klankosova.tv, ai ka treguar edhe problemet që u solli ky shpërthim.
“Ky është një akt terrorist për ne, është hedhur një mjet shpërthyes në infrastrukturën e kanalit të ujit të Ibër Lepencit”.
“Është dëmtuar kanali kryesor që furnizon me ujë kompanitë ujësjellëse dhe Korporatën Energjetike të Kosovës”, ka thënë Mujka.
Mujka ka shtuar se qytetarët nuk kanë furnizim me ujë dhe KEK-ut ka problem që “t’i ftohë turbinat”.
Tutje, i njëjti shtoi se ekipet punuese janë në vendin e ngjarjes dhe po merren me sanimin e dëmit nga shpërthimi në kanalin e ujit të “Ibër Lepencit”.
“Jemi duke u marrë me sanimin, ekipet janë në vendin e ngjarjes”, ka thënë Mujka.
Shpërthimin e fuqishëm që ka ndodhur në fshatin Varagë të Zubin Potokut, e bëri të ditur zëvendësdrejtori i policisë për rajonin e veriut, Veton Elshani.
