Ministria e Punëve të Brendshme i ka bërë thirrje qytetarëve që t’i respektojnë rregullat dhe të kenë kujdes në përdorimin e fishekzjarrëve dhe mjeteve tjera piroteknike gjatë festave të fundvitit.
Ndonëse në shumicat e komunave është ndaluar përdorimi i mjeteve piroteknike, MPB-ja ka thënë se shitja e fishekzjarrëve ka qenë e lejuar nga 19 dhjetori deri më 31 dhjetor, ndërsa përdorimi nga 26 dhjetori deri më 2 janar.
”Në mënyrë që të mos vijë deri tek rrezikimi i shëndetit, fishekzjarrët dhe mjetet tjera piroteknike duhet të përdoren vetëm nga të rriturit e po ashtu edhe shitja apo blerja duhet të bëhet nga personat e rritur dhe atë sipas kategorisë se fishekzjarrëve. Shitja, blerja dhe përdorimi i fishekzjarrëve është i ndaluar në rrugë publike, sheshe, vendbanime të dendura me ndërtesa dhe në të gjitha hapësirat e mbyllura, në afërsi të spitaleve, në mjetet e transportit të udhëtareve etj. Pas blerjes së fishekzjarrëve dhe mjeteve tjera piroteknike, konsumatorët duhet të jenë të përgjegjshëm dhe të sigurohen që këta artikuj të mos dëmtohen gjatë transportit dhe në shtëpi t’i vendosin në vend të sigurt ku fëmijët të mos kenë qasje. Luten qytetarët që para përdorimit të fishekzjarrëve të lexohen udhëzimet e përdorimit të vendosura në produkt. Me këtë rast, Ministria e Punëve të Brendshme i uron Vitin e Ri 2021 të gjithë qytetarëve të Republikës së Kosovës”, thuhet nga MPB-ja./FrontOnline/
