Qeveria e Kosovës ka miratuar vendimin e Ministrisë së Shëndetësisë për shtesat mujore mbi pagën bazë për personelin e institucioneve shëndetësore të angazhuar në betejën kundër COVID-19, për muajt shtator, tetor, nëntor dhe dhjetor.
Ministri i Shëndetësisë, Armend Zemaj tha se kategorizimi është bërë në bashkërendim dhe me personelin shëndetësorë, përfaqësuesit e tyre, me kryeministrin dhe Ministrinë e Financave.
“Për shkak të pandemisë, shtesat mujore mbi pagën bazë për personelin e institucioneve shëndetësore publike të mbështetën për mes listës së pagave në të tri nivelet e kujdesit shëndetësorë të angazhuar në betejën kundër COVID-19 të angazhuar për muajt shtator tetor, nëntor dhe dhjetor të këtij viti. Kategorizimi është bërë në bashkërendim dhe me personelin shëndetësorë, përfaqësuesit e tyre dhe me kryeministrin dhe Ministrinë e Financave”, ka thënë Zemaj.
Ndërsa ministrja e Financave, Hykmete Bajrami kërkoi që këtij vendimi t’i shtohen dhe disa pika.
“Vendimi dhe marrëveshja me përfaqësuesit shëndetësor është arritur dje. Propozoj që vendimit t’i shtoj dhe disa pika në mënyrë që të bëhet i ekzekutueshëm. Në vendim tek pika 1 të specifikohet saktë se vlen për personelin aktiv në vend të punës për muajin e plotë për të cilën merret shtesa, pasi disa prej pandemisë nuk kanë qenë. Gjithashtu vendimit duhet t’i shtohet dhe një pikë buxheti. Për tu paguar këto shtesa të merren nga linjat aktuale buxhetore përmes alokimeve të parakohshme dhe harmonizimeve të brendshme ku jepen shtesat. Ndërsa në linjat ku ka mungesë buxheti, ai do të sigurohet me një linjë të veçantë të Qeverisë. Dhe një pike tjetër kërkoj që shtesat të paguhen në mënyrë retroaktive për muajt që personeli kanë qenë të angazhuar. Dhe ekzekutimi të bëhet në muajt nëntor dhe dhjetor”, ka thënë Bajrami.
Ndërsa, zëvendëskryeministri Besnik Tahiri potencoi se buxheti i shtesave është duke iu afruar buxhetit të pagave.
“Buxheti i shtesave është duke iu afruar buxhetit të pagave. Në këtë kuptim duhet t’i shohim edhe kategoritë e tjera që në bazë të kornizave t’i fusim. Ne duhet të bëjmë këtë ushtrim që është shumë i vështirë sepse procesi i shtesave është shumë i vështirë”, ka thënë Tahiri.
Ndryshe, Qeveria e Kosovës sot ka miratuar projektbuxhetin për vitin 2021. Buxheti për vitin e ardhshëm do të jetë 2.4 miliardë euro, 200 milionë euro më pak se buxheti i vitit 2020.
