Ministri në detyrë i Shëndetësisë, Armend Zemaj, ka ftuar qytetarët që t’i zbatojnë rekomandimet për luftimin e COVID-19. Kjo thirrje e tij vjen tri ditë pasi u kritikua për një tubim që kishte mbajtur në Deçan.
Ai vetë kishte postuar fotografi në rrjetin social Facebook e në të cilën shihet Zemaj në një tavolinë të madhe me dhjetëra aktivistë të LDK-së, pa maska e pa distancë.
Ftesën e tij për zbatim të rekomandimeve për luftimin e COVID-19, Zemaj e bëri në një postim të ri në Facebook ku njoftoi për ditën rekord të testimeve. Të mërkurën u testuan 2325 persona, nga të cilët 12.9 për qind dolën pozitivë – 301 mostra.
“Kërkoj nga secili që ta ruajmë shëndetin e njëri-tjetrit dhe shëndetin publik, sepse, ngarkesat në spitale janë rrezik i shtuar edhe për profesionistët për të ofruar përkujdesje, edhe për pacientët dhe familjet të cilat presin përkujdesje cilësore shëndetësore. Ju bëj ftesë të gjithë qytetarëve t’i zbatojnë rekomandimet për luftimin e Covid 19. Bashkë ia dalim! Barte maskën! Ruaje distancën! Mbaje higjienën!” ka shkruar ai.
Pos LDK-së, në parafushatë edhe partitë tjera kanë shkelur masat anti-COVID. Të martën u raportua për mbledhjen e qindra personave në Skenderaj në fushatën e PDK-së.
