Ministri gjerman i Mbrojtjes Boris Pistorius mbërriti në Kiev të martën për një vizitë që synon të dërgojë një sinjal të qartë të mbështetjes së Evropës përpara inaugurimit të presidentit të zgjedhur amerikan Donald Trump, i cili ka shtyrë për bisedime të shpejta për t’i dhënë fund luftës në Ukrainë.

“Gjëja e parë dhe më e rëndësishme është ta bëjmë shumë të qartë psikologjikisht dhe politikisht se ne do të vazhdojmë të qëndrojmë pranë Ukrainës”, tha Pistorius pas mbërritjes në Kiev.

Ai do të takohet me qeverinë ukrainase për të diskutuar ndihmën e mëtejshme dhe do të vlerësojë situatën ushtarake.

Vizita e Pistorius, e cila synon gjithashtu të sinjalizojë mbështetjen e Berlinit për Kievin në zgjedhjet gjermane të muajit të ardhshëm, vjen më pak se një javë përpara se Trumpi të betohet për një mandat të dytë si president i SHBA më 20 janar.

Trumpi thotë se do ta zgjidhë shpejt luftën në Ukrainë dhe ka kritikuar shkallën e mbështetjes së SHBA për Kievin.

Pistorius, një anëtar i socialdemokratëve të kancelarit Olaf Scholz, tha se Ukraina kërkon veçanërisht mbështetje pasi presidenti rus Vladimir Putin “sigurisht po përpiqet të krijojë sa më shumë terren që të jetë e mundur përpara 20 janarit në pritjet e mundshme të negociatave të armëpushimit”.

Gjermania është ndër mbështetësit kryesorë ushtarakë të Ukrainës në luftën e saj kundër Rusisë.