Dhuna e ushtruar ndaj qytetarëve të Kosovës nga ana e policëve sa vjen e po shtohet dita-ditës.

Një rast i tillë kishte ndodhur edhe në fund të muajit janar.

Polici Naim Krasniqi dyshohet se i kishte tejkaluar autorizimet e tij, duke keqtrajtuar tre qytetarë, për shkak se, sipas tij, ata e kishin ngacmuar gruan e tij, rast për të cilin u arrestua sot.

Burime të afërta me viktimat deklaruan se përderisa tre viktimat ishin në rrugë, afër tyre kishte kaluar bashkëshortja e policit, ndërkaq prapa saj, diku rreth 50 metra ka qenë edhe bashkëshorti i saj. Ai fillimisht e ka gjurmuar tabelën e veturës së viktimave dhe përmes tabelës e ka identifikuar pronarin e veturës dhe i ka urdhëruar që të paraqiten në stacionin policor në Lipjan.

Të tre viktimat e kanë zbatuar ankesën e tij duke mos ditur se për çka janë ftuar dhe me të hyrë në stacionin e policisë, janë keqtrajtuar rëndë nga polici. E gjithë ngjarja dyshohet se ka ndodhur më 29 janar 2021 ndërsa është raportuar më 1 shkurt, raporton Sinjali.