Konservatorët gjermanë të CDU/CSU nën kancelarin potencialisht të ardhshëm Friedrich Merz ranë dakord për një marrëveshje koalicioni me Social Demokratët e qendrës së majtë (SPD) të mërkurën me synimin për ringjalljen e ekonomisë më të madhe të Europës pikërisht kur një luftë tregtare globale kërcënon recesionin.

Marrëveshja përfshin disa javë pazaresh midis Merz dhe SPD-së, pasi ai doli i pari në zgjedhjet e mbajtura në shkurt, por që nuk arriti të fitonte një shumicë meqë partia e ekstremit të djathtë AfD u ngjit në vendin e dytë, shkruan The Guardian, transmeton Gazeta Express.

Në një konferencë për shtyp të koalicionit në Berlin, të cilën e hapi, Merz tha se koalicioni ka “një plan të fortë” si rezultat i negociatave, i cili do të dërgojë “një sinjal të qartë” si për gjermanët ashtu edhe për partnerët europianë se “Gjermania do të ketë një “qeveri të fortë dhe efektive”.

Investimet, migrimi, siguria janë ndër prioritetet e para, tha Merz.

Duke paraqitur skicën e marrëveshjes së arritur, Merz flet për fokusin e tij në sjelljen e më shumë investimeve me ndryshime në taksat e korporatave dhe energjisë dhe stimuj që  nxisin ekonominë.

Më pas ai kalon në politikën e migracionit, duke premtuar “një kurs të ri” me një sërë politikash më të rrepta që synojnë “t’i japin fund migrimit të parregullt” nëpërmjet kontrolleve më të rrepta kufitare, shtrëngimit të rregullave të azilit dhe shtytjes për riatdhesimin e atyre që kanë hyrë ilegalisht në Gjermani.

Ai thotë gjithashtu se qeveria e re do të pezullojë rregullat e bashkimit familjar dhe do të rrisë numrin e vendeve të klasifikuara si të sigurta. Ai gjithashtu lë të kuptohet për ndryshime në rregullat e shtetësisë për t’i ngadalësuar ato, me natyralizimin sa më të hershëm të mundshëm pas pesë vjetësh.

Duke iu kthyer temës së sigurisë, ai rendit politikat e reja të propozuara, duke përfshirë ruajtjen e të dhënave dhe thotë se do të krijojë një Këshill të ri Federal të Sigurisë, me bazë në Zyrën e Kancelarit, për të menaxhuar krizat kombëtare.

Ai premton gjithashtu shpenzime më të larta për mbrojtjen dhe sigurinë dhe lë të kuptohet për një propozim për të forcuar shërbimin ushtarak mbi baza vullnetare.

Merz konfirmon se teksti i negociuar mes tyre tani do të dorëzohet për miratim nga të dyja palët.

Ai thotë se teksti i rënë dakord është rezultat i “konsultimeve dhe negociatave intensive”, ndërsa falënderon ekipet negociuese për punën e tyre.

Merz tha se preferonte të miratonte ndryshimet në Kushtetutën e Gjermanisë vetëm pas formimit të qeverisë, por kjo nuk ishte një opsion me ndryshime në aritmetikën parlamentare.